“Palabres para amar el planeta”, d’Ella Frances Sanders, regálanos un vocabulariu nuevu para nomar lo que yá sentíamos frente a la naturaleza pero nun sabíamos cómo dicir. Cada palabra ye una manera distinta de mirar el sol, el mar, la tierra, el cielu… Ficha editorial /
Ye una obra bellamente ilustrada qu’axunta más de 200 palabres procedentes de 80 llingües, capaces d’allumar la nuesa relación cola naturaleza, el tiempu, les emociones y la vida compartida. Al traviés del llinguaxe, Ella Frances Sanders convídanos a mirar el planeta con mayor atención, sensibilidá y respetu.
Entamáu en siete bloques temáticos –les estaciones, el clima, la tierra, l’agua, el ser y el tiempu–, el llibru percuerre cultures, paisaxes y formes de pensar diverses. Cada términu inclúi la so traducción, pronunciación y un curtiu comentariu qu’esplica’l so orixe llingüísticu o cultural, arriquecíu con notes etimolóxiques y referencies qu’amplíen el so significáu.
Cola mesma frescura y sensibilidá que caractericen les sos obres anteriores, l’autora de Lost in translation, abre un espaciu dende’l que reparar, entender y curiar el mundu qu’habitamos. Palabres para amar el planeta ye una invitación a reconectar cola redolada y a imaxinar, al traviés del llinguaxe, un futuru más habitable y consciente.
