D’Urria gana’l premiu ‘MT 2026 Mejor Disco Folk Reino de León’. El discu ‘De Fuentesila a Primóu’ de la formación l.laciniega ye distinguíu con esti gallardón que reconoz a la música tradicional llionesa. Musicasturiana.com
La formación l.lacianiega D’Urria ta acabante d’anunciar que ye la banda escoyida polos Premios MT p’algamar el reconocimientu a Mejor Disco Folk Reino de León col álbum De Fuentesila a Primóu. Estos gallardones son de calter anual y «reconocen el valir y el trabayu desendolcáu al rodiu la música tradicional del Reinu Vieyu de Llión (provincies de Llión, Salamanca y Zamora) por parte de xóvenes, músicos y agrupaciones tradicionales» d’esti territoriu. Nacieron en 2009 como una iniciativa surdida nel IES León Felipe de Benavente (Zamora) y tán entamaos por esti institutu y pola Asociación Reino de León Amigos del Folklore.
De Fuentesila a Primóu ye’l segundu trabayu de llarga duración de D’Urria, formación creada en 2018 pol músicu de L.laciana José Manuel Sabugo y que s’estrenó hai siete años con En ca pla, un discu de que tuvo perbona acoyida y convirtió a esta formación l.lacianiega nuna de las más interesantes de la fornada nueva del folk cantáu n’asturllionés.
El so repertoriu ta formáu por composiciones propies y reellaboración de pieces tradicionales del suroccidente asturianu y de L.laciana y, ente los sos componentes, hai músicos asturianos de renome como Daniel Álvarez (Corquiéu, Llau…). La publicación d’esti segundu discu de llarga duración foi faciéndose adulces: el grupu llanzó trés cantares en xunu de 2025, otres trés n’agostu y completó’l trabayu con otres trés pieces llanzaes n’avientu del pasáu añu.
