Cultura va facilitar a les entidaes locales una guía pa la normalización llingüística
- El Principáu dota pela primer vez a la Rede de Normalización Llingüística d’un presupuestu propiu de 50.000 euros, que se suma a la financiación estable de los Servicios incrementada un 66 % dende’l 2019
- La conseyería axunta a los conceyos pa evaluar el trabayu realizáu y presentar recursos nuevos y ferramientes d’apoyu
- L’Executivu presenta la versión nueva del traductor dixital Eslema, qu’amplía les sos prestaciones, y va integrar la traducción al eonaviegu la selmana próxima
La conseyera de Cultura, Política Llingüística y Deporte, Vanessa Gutiérrez, anunció esta tarde na reunión de la Rede de Normalización Llingüística en Llaboral Ciudá de la Cultura que’l so departamentu prepara una Guía pa impulsar nel ámbitu municipal la normalización de les llingües propies d’Asturies y pa garantizar los derechos llingüísticos de les sos falantes, que va poner a disposición de los entes locales y de los sos servicios de normalización. Esa Guía va cuntar con información y documentación actualizaes, y formula propuestes d’acciones de promoción del asturianu y del eonaviegu n’ámbitos como l’actividá municipal, el comerciu, la dinamización cultural y l’ociu.
Nel alcuentru, Vanessa Gutiérrez fixo balance del llabor desenvueltu polos Servicios de Normalización Llingüística nos años últimos, que vieron incrementaos los sos recursos por parte de la conseyería nun 66 % dende’l 2019.
Pa esti 2026, Cultura destina 415.320 euros a la financiación de los mentaos Servicios de Normalización, qu’ufierten apoyu en 36 conceyos, incluyendo asina al 60 % de la población asturiano. Amás, la Rede de la que formen parte alredor de 40 conceyos y otres entidaes cunta pela primer vez con un presupuestu propiu de 50.000 euros pal desenvolvimientu d’actividaes complementaries que contribuyan a la normalización efectiva de les llingües propies de la comunidá autónoma, l’asturianu y l’eonaviegu.
Eslema, el traductor al serviciu de la ciudadanía
De la mesma manera, esta tarde presentáronse meyores en recursos clave, como l’actualización del Eslema, la versión ameyorada del traductor al asturianu, que va incorporar la selmana próxima, coincidendo cola celebración de la Selmana de les Lletres Asturianes, la función de traducción al eonaviegu. Cultura amplía asina les capacidaes tecnolóxiques disponibles pa dambes llingües.
A esti avance súmase la publicación na web institucional de Política Llingüística de los modelos de formularios alministrativos descargables n’asturianu, facilitando’l so usu na xestión diaria de los conceyos. Los documentos pueden descargase en: https://politicallinguistica.asturias.es/
Meyores nes ferramientes pa la normalización de les llingües propies
La conseyera presentó a los representantes de los conceyos la Estratexa de Normalización del Asturianu y del Eonaviegu 2026-2030 ellaborada pol so departamentu. Esti documentu ta concebíu como una ferramienta tresversal con 245 acciones concretes p’avanzar na normalización social. Nesti sentíu, nel marcu de la reunión repasáronse dalgunos de los finxos de la llexislatura en materia de política llingüística, destacando, amás de la mentada Estratexa, l’aprobación de les primeres Instrucciones relatives a los criterios llingüísticos nel ámbitu de l’Alministración del Principáu d’Asturies y el so sector públicu.
Estes dos midíes son fundamentales pa la normalización y la planificación llingüística, que pueden ser adaptaes y reproducíes nel ámbitu local, llabor pal que la conseyería ufiertó asesoramientu y apoyu.
De la mesma manera, destacóse l’aprobación del Mandatu Marcu de la RTPA nel 2025, qu’establez l’usu normalizáu del asturianu y l’eonaviegu nel ente públicu. Nel campu educativu, púnxose en valor la introducción de dambes llingües na educación infantil nel cursu 2025-2026 como área d’aprendimientu voluntaria, con una acoyida positiva por parte de les families, incrementando’l porcentaxe d’alumnáu total matriculáu un 34,2 % en toles etapes, amás de la incorporación del asturianu a la ufierta de la Escuela Oficial d’Idiomes d’Uviéu.
La Rede de Normalización Llingüística
La Rede de Normalización Llingüística creóse nel 2022 como un órganu colexáu d’adhesión voluntaria, concebíu como espaciu de participación institucional y d’impulsu de les llingües propies. Ente les sos funciones figura la coordinación de les actividaes de los servicios de normalización de los conceyos, amás del desenvolvimientu d’acciones pa dinamizar l’usu social del asturianu y l’eonaviegu.
Con esti conxuntu de midíes, el Gobiernu d’Asturies afianza una política llingüística basada na planificación, la cooperación institucional y el desenvolvimientu de ferramientes útiles, cola mira de garantizar los derechos llingüísticos y la tresmisión xeneracional.
