Barnes pertenez a la xeneración d’escritores británicos surdíos a finales de la década de los sesenta y entamos de los setenta como Martin Amis o Salman Rushdie y esti añu asoleyó ‘Despedidas’ (Anagrama), una obra sobre la memoria, la vieyera y l’amor, que dio anuncia de que sedrá’l so últimu llibru.
Autor de noveles como ‘El loro de Flaubert’, ‘Hablando del asunto’ y ‘Nada que temer’, una esploración de la muerte dempués d’envilbar en 2008 de la que foi tamién la so axente lliteraria, Pat Kavanagh, foi un firme opositor al Brexit y afirma sentise más inglés que británicu poles implicaciones imperiales del términu.
Ente otros galardones recibió’l Premiu E. M. Forster de l’American Academy of Arts and Letters, el William Shakespeare de la Fundación FvS d’Hamburgu y el Man Booker, y ye amás Caballeru de la Orde de les Artes y les Lletres que da’l Ministeriu de Cultura de Francia.
El novelista d’Inglaterra sucede asina al español Eduardo Mendoza nel palmarés del Premiu Princesa d’Asturies de les Lletres, el penúltimu en fallase de los ocho galardones que concede añalmente la Fundación que lleva’l títulu de la heredera de la Corona y que sedrán entregaos n’ochobre.
- «Cada hestoria d’amor ye en potencia una hestoria d’aflicción. Si non de primeres, más tarde. Si nun para unu, para l’otru. Dacuando para dambos.» (Niveles de vida)
- «Cuando somos xóvenes, inventamos futuros distintos para nós mesmos; cuando somos vieyos, inventamos pasaos distintos para los demás.» (El sentíu d’un final)
- «La memoria ye un actu de voluntá, y tamién lo ye l’olvidu. Si recuerdes el to pasáu demasiáu bien empieces a culpa-y del to presente.» (Falando del asuntu)
- «El tiempu camúudalo tou, inclusive les alcordances que tenemos de les coses.»
«Vivimos a ras de suelu… pero aspiramos a alzanos. Dalgunos álcense por mediu del arte, otros cola relixón; la mayoría, col amor.» (Niveles de vida)
