Coincidiendo cola Selmana de les Lletres Asturianes, Musicasturiana.com creamos cuatro nueves llistes de reproducción en Spotify: Asturianada, Gaita, IndieNast y Música Nueva Asturiana.
Súmense asina a les yá esistentes Música Asturiana, Folk Asturianu, Rock n’Asturianu, ¡A Baillar!, Novedaes y les series de playlists d’Esto ye y La banda sonora de... Con estes playlists siguimos avanzando na nuestra xera d’esparder la música’l país per tol mundu gracies a les plataformes musicales.
Asturianada compila 60 temes de pieces d’ayeri y güei de la forma más tradicional de cantar n’Asturies; Gaita inclúi 50 pieces de bandes de gaites y gaiteros solistes. Estes dos llistes de reproducción tán esbillaes pol Doctor en Musicoloxía, gaiteru y miembru del Conceyu de la Gaita, Luis Francisco Álvarez Pola.
Per otru llau IndieNast tien cantares n’asturianu de la escena indie, pop, canción d’autor y indie-folk, mientres que Música Nueva Asturiana recueye les espresiones más contemporánees de la música’l país: Electrónica, rap, post-folk, tonada renovada…. Súmense asina a les cuasi 70 playlists que tien Musicasturiana.com en Spotify, con más de 6.500 siguidores.
