Publicado en 7DÍES, Calentamientu global

L’aumentu de temperatura climática sal del gráficu

L’aumentu de temperatura climática sal del gráficu. Ente xineru y setiembre de 2026, la temperatura media mundial en superficie asitióse aproximadamente 1,47 °C perriba de la media de la era preindustrial. 7 Díes

L’informe preliminar de la OMM (Organización Mundial Meteorolóxica) sobre l’estáu del clima mundial en 2026 indica que caún de los postreros 12 años tuvo ente los 12 más cálidos que se tien constancia y que los cuatro más recién encabecen la serie. Ente xineru y setiembre de 2026, la temperatura media mundial en superficie asitióse aproximadamente 1,47 °C perriba de la media de la era preindustrial.

Ye probable qu’esta cifra aumente d’equí a finales d’añu por mor del efeuto de calentamientu causáu por El Niño. L’episodiu en cursu intensifícase dende agostu y prevese que n’avientu seya’l más fuerte enxamás rexistráu.

El desequilibriu enerxéticu de la Tierra acentúase y el sistema Tierra atropa calor a un ritmu cada vegada mayor. El desequilibriu algamó’l so valor más altu desque s’empezaron los rexistros, yá que los gases d’efecuu invernaderu retienen cantidaes de calor ensin precedentes y alteren l’equilibriu ente la enerxía solar entrante y la enerxía saliente. Los océanos absuerben el 90 % d’esti escesu de calor, y too apunta a qu’en 2026 el so conteníu caloríficu va algamar un máximu históricu per décimu añu consecutivu.

El nivel del mar algamó’l valor más altu desque empezaron los rexistros y les temperatures de la superficie del mar batieron récords mensuales en 2026. Caltiénse l’enclín al llargu plazu de retrocesu de los glaciares: col xelu que perdieron en 2025 podríen enllenase cinco piscines olímpiques per segundu mientres tol añu. Les reserves d’agua duce mengüen dende 2014.

L’informe completu, descargable equí, tresmite los cinco mensaxes clave sobre los que quier alarmar:

– 2026 va ser unu de los cuatro años más cálidos enxamás rexistraos
– El Niño intensifica’l calor y multiplica los riesgos
– El nivel del mar y el conteníu caloríficu de los océanos atópense en máximos históricos
– Los fenómenos meteorolóxicos estremos tienen un enorme costu humanu y económicu
– Los pronósticos y les alertes, sofitaos n’observaciones continues, son vitales

Autor:

Maestra de Llingua Asturiana Colexu Carmen Ruiz-Tilve - Uviéu