Un atún coloráu de 163 quilos na rula d’Avilés. La especie nun ye habitual na cancha avilesina, pola qu’apenes pasaron cinco exemplares nos postreros trenta años. LNE /El Comercio
Un exemplar d’atún coloráu de 163,5 quilos como’l que se puyó esta mañana na Rula d’Avilés llama l’atención. Non tantu pol tamañu del pexe, una y bones los d’esta especie pueden algamar hasta los 300 kilogramos, pero sí pola rareza d’atopalo nes agües de la zona. Pola rula avilesina nun son habituales.
«Nos postreros 30 años nun pasaríamos de los 4 o 5 exemplares. L’anterior vendióse’l 24 xunetu de 2024 y pesó 76 quilos», cunta’l xefe de Cancha de la Nueva Rula d’Avilés, Jorge Fernández.
Pescose esti martes l’arrastreru de mariña Eleuterio José Balayo a unes 14 milles al Norte, ente Cuideiru y L.luarca, y descargóse n’Avilés sobro la medianueche. Foi puyáu a primer hora y el so comprador foi’l mayorista Gerardo Granda y, «anque nun tescendió’l so destín final, ye poco probable qu’esti exemplar de Thunnus thynnus pueda trate nos mostradores de les pescaderíes y supermercaos asturianos», cunten.
L’atún coloráu ta sometíu a una regulación específica, de cuenta que les embarcaciones autorizaes qu’afaenen nel Cantábricu pueden pescar, siempres de manera casual, un exemplar por marea y día. El d’esta mañana foi’l primeru en ser prindáu nestes condiciones, qu’inclúin tamién el deber de comunicar la descarga con cuatro hores d’antelación.
Tamién tienen de ser marcaos a bordu con un indicador facilitáu pol Ministeriu d’Agricultura, Pesca y Alimentación. Trátase d’unos dispositivos que fueron incorporaos a les embarcaciones que trabayen n’Avilés nes últimes selmanes.
Jorge Fernández señaló que «los barcos treslládennos qu’hai atunes coloraos nel Cantábricu y agora tienen la posibilidá de prindalos dientro de les condiciones establecíes. Ábrese una nueva oportunidá que puede dexar qu’estes captures lleguen a la Rula d’Avilés con mayor frecuencia».