Esperamos una xornada nubosa en tol Principáu. Estes nubes van dexar bastios que van ser más probables na metá sur asturiana, pero nun se refuga que puedan estendese a otros puntos de la rexón. Amás, podríen venir acompañaos de nube. Nel tramu final del día prevese que s’abrirán escamplaes nel cielu. Tocantes a los vientos, van ser fluexos y variables, anque predominando d’oeste na mariña y con dalguna qu’otra racha moderada. Les temperatures máximes van baxar hasta 5 o 6 ºC nel cordal, hasta 3 o 4 ºC nel restu del interior, y de forma más llixera na mariña y zones próximes. Les temperatures mínimes van xubir nel centru y nel oriente, y van caltenese ensin cambeos nel sector occidental.
El sábadu va amanecer el día con bastante nubosidá na metá norte, y con cielos más llimpios escontra’l sur d’Asturies. Comoquier, a lo llargo del día les nubes van acabar cubriendo tol cielu asturianu. La probabilidá de precipitaciones va ser baxa anque, de forma residual, podría escapase dalgún bastiu pocu importante nel cordal. Les temperatures máximes, nel casu del sábadu, van caltenese salvu na zona sur onde llixeramente van xubir.
