LNE/ El Gobiernu d’Asturies va activar esti miércoles, a les 8.00 hores, el Plan d’Emerxencies del Principáu (Platerpa) en fase d’alerta para controlar la seguridá na xornada del eclís solar total.
El conseyeru de Movilidá, Mediu Ambiente y Xestión d’Emerxencies, Alejandro Calvo, dixo esti martes qu’el so departamentu va dir ufiertando información mientres tol día sobro’l dispositivu, la situación del tráficu y la meteoroloxía. La web https://eclipseasturias2026.ficyt.es/ unifica tola información relevante.
L’entamu del eclís parcial ta previstu para les 19.30 hores, el momentu de totalidá para les 20.26 y el final, sobro les 21.20 hores. El momentu en que la Lluna va cubrir dafechu’l Sol va durar aprosimao ente 1 minutu y 40 segundos y 1 minutu y 50 segundos, en función del puntu dende’l que se repare.
Calvo encamentó que s’eviten desplazamientos pa contemplar el fenómenu astronómicu y aconseyó que, si ye precisu viaxar, prímese’l tresporte públicu. “Tenemos 26 rutes específiques pa sableres, espacios naturales y otros llugares privilexaos d’observación a disposición de la ciudadanía, tanto pa la ida como pa la vuelta”, sorrayó’l titular.
El titular de Movilidá tamién aportunó na obligación de respetar siempres la redolada y el mediu natural, especialmente si se va a contemplar l’eclís dende dalgún de los espacios protexíos de la comunidá, y na necesidá d’utilizar gafes homologadas.
El Gobiernu del Principáu preparó un dispositivu especial de movilidá pa facilitar l’accesu a dalgunos de los puntos d’observación encamentaos, con un refuerzu xeneral de servicios y frecuencies, vehículos de mayor capacidá y ampliación d’horarios.
Asina, dalgunes de les danzaderes del programa Esfruta del branu, nós llevámoste, van estender mañana l’horariu y tamién va aumentar el númberu de percorríos de delles llínees regulares escontra les zones de mayor arribación turística, especialmente los llugares de mariña.
Amás, van ampliase los servicios metropolitanos hasta les 1.00 hores na área central (Uviéu-Xixón-Avilés) y en corredores acomuñaos como los que xunen Xixón-Candás-Lluanco, según la llínea Piedres Blanques-Avilés que da serviciu a Salinas. Los horarios y les rutes pueden consultase nel enllaz: https://www.ctaconecta.com/ye/noticies
Trayectoria que va siguir l’eclís.
