El Gobiernu del Principáu promociona la marca ‘Asturies Paraísu Natural’ nel derbi por aciu un alcuerdu col Real Uviéu y el Real Sporting de Xixón. L’acción forma parte del patrociniu promovido pol Executivu, dotáu con 180.000 euros para cada club, coles mires de reforzar la proyección turística de la comunidá. Actualidá
El Gobiernu del Principáu algamó un alcuerdu col Real Sporting de Xixón y el Real Uviéu para impulsar la promoción turística de la comunidá y reforzar la proyección de la marca Asturies Paraísu Natural al traviés del fútbol profesional.
La iniciativa da cumplimientu al anunciu realizáu esta selmana pol presidente del Principáu, Adrián Barbón, mientres l’alderique d’orientación política celebráu na Xunta Xeneral. L’actuación enmárcase na estratexa del Executivu autonómicu para aprovechar la capacidá d’espardimientu del deporte d’élite como ferramienta de promoción turística, económica y territorial.
L’alcuerdu inclúi un patrociniu de 180.000 euros destináu a venceyar la marca Asturies Paraísu Natural colos dos principales clubes de fútbol de la comunidá. Tantu’l Real Uviéu como’l Real Sporting cunten con una enorme capacidá de movilización social y una destacada proyección mediática dientro y fora d’Asturies.
La primer acción d’esta collaboración va tener llugar esti mesmu domingu, cola celebración del derbi: dambos equipos van llucir la marca Asturies Paraísu Natural nos sos equipaciones, acomuñando la imaxe de la comunidá a unu de los acontecimientos deportivos con mayor siguimientu y repercusión mediática del añu.
El derbi va convertise asina nun escaparate privilexáu para promocionar Asturies énte millones d’espectadores. La enorme espectación que xenera esti alcuentru, xunida a l’amplia cobertoria informativa prevista, va dexar reforzar la visibilidá de la marca turística de la comunidá tanto nel ámbitu nacional como n’otros países.
Esta acción constitúi’l puntu de partida d’una collaboración que va tener continuidá a lo llargo de la temporada por aciu nueves iniciatives de comunicación y publicidá que se van dar a conocer nos próximos meses.
Con esti alcuerdu, el Gobiernu d’Asturies refuerza’l so apueste por fórmules innovadores de promoción venceyaes a referentes capaces de proxectar la identidá, los valores y el potencial turísticu de la comunidá. La collaboración col Real Sporting y el Real Uviéu va dexar ampliar l’algame de la marca Asturies Paraísu Natural y consolidar la so presencia en dalgunos de los principales escaparates deportivos del país.

