Candás celebra San Félix col so esperáu Festival de la Sardina. Del 31 de xunetu al 3 d’agostu, la villa marinera va ufiertar una intensa programación para toles edaes con música, gastronomía, tradición, espectáculos infantiles y grandes verbenes, que va rematar col conciertu de Los 40 Summer Live.
La villa marinera volverá convertise n’unu de los grandes focos festivos del Principáu cola celebración de les fiestes de San Félix, declaraes Fiesta d’Interés Turísticu Rexonal y convertíes dende va décades nun referente del calendariu branizu pola so capacidá para combinar tradición, gastronomía, música y diversión para toles edaes.
Del 31 de xunetu al 3 d’agostu, el Conceyu de Carreño volverá sacar la fiesta a la cai con una programación pensada por que vecinos y visitantes esfruten de cuatro intenses xornaes nes que nun van faltar los pasacais, les actividaes infantiles, les grandes verbenes, los espectáculos, les propuestes familiares y la so gran seña d’identidá: el LV Festival de la Sardina, una cita imprescindible que #cada añu axunta a miles de persones alredor d’una de les tradiciones más enraigonaes de la mariña asturiana.
