Cúmplense 90 años del fusilamientu de Federico García Lorca ensin que se sepa entá’l paraderu del poeta. El Peñón del Colorado de Alfacar en Granada foi oxetu d’abondes búsquedes de los sos restos, hasta’l día de güei desapaecíos.
Federico García Lorca foi fusiláu la madrugada del 18 d’agostu de 1936. Xunto a él, el maestru republicanu Dióscoro Galindo y los banderilleros Francisco Galadí y Joaquín Arcollas.
Delles escavaciones, inxerta una de la Xunta d’Andalucía nel añu 2009 acabaron ensin éxitu p’alcontrar los restos del poeta.
L’Asociación pa la Recuperación de la Memoria Histórica pide que se desclasifiquen los documentos venceyaos al asesinatu de Lorca y les repercusiones que tuvo. Consideren un anacronismu qu’España caltenga una Llei de Secretos Oficiales del franquismu.
L’ambiente de secretu qu’escuende l’asesinatu de Lorca nun fai más qu’agrandar una lleenda que como nel so poema medra col tiempu. La fascinación qu’espierta non sólo la so herencia lliteraria, sinón la so persona, fai qu’agora que se cumplen 90 años del so asesinatu llibros y películes vuelvan a traer a Lorca a l’actualidá.
Nel casu de ‘No me encontraron’, el llibru d’Ian Gibson sobre la búsqueda de los sos restos, asoleyáu esti branu; o ‘La bola negra’, la película de los Javis que s’estrena en setiembre en cines y que ta basada nuna novela inacabada que Lorca entamó a escribir nel 36 y na que falaba abiertamente d’homosexualidá.
