Autor GERMÁN HORACIO /Testu LETICIA SÁNCHEZ RUIZ
Celebramos el Día d’Asturies publicando la portada d’un artista que representa una Asturies que vivió fondos tresformamientos mientres la primer metá del sieglu XX; la de quien tuvieron que colase, la de quien perdieron la so casa, la de quien llevaron consigo una llingua, unos paisaxes y una memoria que yá nun podíen habitar.
La vida de Germán Horacio ye en munchos sentíos, el reflexu d’una xeneración d’asturianos trevesaos pola hestoria.
Nacíu en Xixón en 1902, fíu del escritor Pachín de Melás, empezó bien llueu a retratar, con humor y mirada costumbrista, la sociedá que la arrodiaba.
Nos años venti consolidó la so carrera como ilustrador, pintor y cartelista, ente Xixón y Madrid, hasta convertise n’unu de los artistes asturianos más reconocíos del so tiempu.
Pero la Guerra Civil tresformó radicalmente la so vida.
N’Asturies punxo’l so talentu al serviciu de la República, trabayando en propaganda, cartelos, escenografíes y publicaciones.
A él debe tamién el diseñu de los belarminos, el papel moneda emitíu pol Conseyu Soberanu d’Asturies y Llión.
Tres la cayida d’Asturies fuxó a Barcelona p’acabar nos campos de concentración franceses, onde siguió dibuxando en tarrecibles circunstancies.
En 1939 embarcó nel Sinaia camín de México. Como tantos otros asturianos empezó ellí una nueva vida.
Siguió trabayando como dibuxante, cartelista y pintor, y llegó a representar a México nun certame internacional de cartelos de la UNESCO.
Germán Horacio morrió en Ciudá de México en 1975 ensin poder tornar a Asturies. Les sos cenices terminaron espardíes nel mar Cantábricu, como si aquel mar que dixebrara al home de la so tierra acabara siendo tamién l’últimu venceyu con ella.
En Germán Horacio conflúi la ilusión d’una xeneración, la rotura d’una guerra y la llarga distancia del esiliu.
Leticia Sánchez @letisaurus ye una de les voces lliteraries que meyor describe’l pulsu de les emociones que traviesen esti territoriu y les almes que la habiten.