Rodrigo Cuevas reina amosando la belleza de la música

Vienres 24 d’abril. Llévantome y hai un sol de restallu p’aprovechar el día enantes de que, a les 21:30 hores, Rodrigo Cuevas vuelva, acompañáu de la so banda y baillarines, a xubir al escenariu xustamente un añu dempués de zarrar l’anterior xira. Nesi casu, Barcelona foi la ciudá escoyida, pero esta xira decidió empecipiala n’Avilés, nel Pabellón d’Esposiciones de La Madalena, un espaciu que se ta convirtiendo en referente pa conciertos de formatu grande.

«Podía alendase un ambiente de los grandes eventos. Yera un día esperáu por munchísima xente»

Aporté bien llueu de la hora del entamu y nos alrededores podía alendase un ambiente de los grandes eventos. La filera de xente esperando a canxear la entrada perpasaba les llendes del recintu media hora enantes del entamu del conciertu, mientres que dientro’l públicu allégabase al escenariu pa poder ver l’espectáculu que diba asoceder dende’l puntu más cercanu posible. Yera, ensin dala dulda, un día esperáu por munchísima xente.

A les 21:15 hores empezaba parte del show, cuando entraron les persones que mercaren la entrada pa tar dientro del propiu escenariu, na recreación del llagar La Panoya Dorada nel que presentó los trés primeros adelantos del discu. Facíenlo con sidra y sentándose neses meses que, una vegada qu’arrancara’l conciertu, diben dar munchu xuegu.

Pasaes les 21:45, les lluces del recintu apagábense y, tres sonar un cantar un cantar de L-R y la intro de Rossy de Palma, grabada por mor de los primeros adelantos de Manual de belleza, mentaos recién, Rodrigo Cuevas salía al escenariu cantando ‘Un mundo feliz‘. Eso sí, ensin Massiel, pero acompañáu de la so banda, formada por Mapi Quintana, Rubén Bada, Juanjo Díaz y Tino Cuesta. Esti cantar diba enllazalu con ‘BLZA’, el tema nel que collaboró con Mala Rodríguez y que cantó sentáu delantre del espeyu, mientres que se maquillaba.

«Rodrigo Cuevas fixo un repasu, mientres dalgo más de dos hores, de los sos manuales: de cortejo, de romería y el más nuevu, el de la belleza»

Nesti entamu, onde’l públicu taba yá entregáu a la causa de la belleza, Cuevas arrancó depués con ‘La hermana cautiva’ y unu de los temes que más prestaron nesta parte del conciertu, ‘Asturcón’, hasta que dio por rematar el primeru de los cuatro bloques nos que separtó’l show enriba del escenariu de La Panoya Dorada, non ensin antes recuperar los cantares ‘Allí arribita’ y ‘Valse’, del so discu anterior.

L’artista glayó que nun entraba más ganáu nel recintu (una referencia al espaciu nel que se taba desenvolviendo’l conciertu) y cuntó, de manera rápida, el porqué del cabaré como escenografía pal entamu d’esta xira: «quería una cápsula espaciu-tiempu onde volvamos a tener el sartén pel mangu y falar de les coses que nos interesen: la belleza y les panoyes». Una vegada cambiáu d’indumentaria, Rodrigo Cuevas fixo un repasu mientres dalgo más de dos hores, ente les más de 4.000 persones qu’enllenaben el Pabellón d’Esposiciones de La Madalena, de los sos manuales: de cortejo, de romería, y el más nuevu, el de la belleza, títulos de los sos trabayos de llarga duración.

Nesti segundu bloque qu’acababa d’arrancar apaeció l’asturianada, pero nun diba ser nes cuerdes vocales del protagonista de la nueche, sinón que foi la voz de Salvador Ondó, unu de los meyores echadores de sidra que, amás de echar unos culinos pa tolos y toles artistes presentes nel escenariu, cantó una pieza que remató na ovación de los que taben presentes, non ensin antes aldericar con Rodrigo sobre lo bien que-y diba nel amor y que, si nun yera a namorar a la moza, siempre tiraba de l’asturianada. Esa pieza yera ‘Aquellos bueyes‘, que grabó Manuel Alonso «El Panaderu» nel añu 1928 y que más tarde diba popularizar cola so versión Xuacu el de Sama.

Esta charra col echador sirvió como prólogu pal siguiente tema, ‘Xardineru’. El show nel cabaré siguía con El pañuelín, con sorpresa al final del cantar, cuando sacó de la boca del baillarín Pablo Dávila esi pañuelín, como si d’un magu se tratara. Yera esti, amás, un tema que volvió a l’actualidá musical porque amás del propiu Cuevas, Marisa Valle Roso grabara la so propia versión del tema d’El Presi nel so últimu trabayu.

Un tiempu de relax enantes de lo que taba por venir, porque xustamente dempués arrancó’l tiempu del baille y la pandereta, con ‘Muiñeira para a filla da Bruxa’, onde se pudo ver nes partes más llaterales del públicu como dalguna xente s’animaba a baillar. Y, de sópitu, cola collaboración de la guitarra de Víctor Martínez, Rodrigo sorprendió con una cover de ‘Hoy lo vi pasar’, de Rocío Durcal.

«Rodrigo Cuevas recordó a Alberto Blanco col tema Rambalín, esi que lu fixo ser Premiu Camaretá al Meyor Cantar nel añu 2020, el de la pandemia. Con esti cantar, recordaba al home qu’asesinaran xustamente va 50 años y lo facía con un discursu de reivindicación de los derechos LGBT»

Otru de los momentos de la nueche taba por llegar y diba tener por protagonista a una de les músiques qu’acompaña al artista na so xira: Mapi Quintana. Con ella, cantó ‘Sácame a bailar’, el pasodoble que grabó con Ana Belén y foi Mapi la que recibió’l gran aplausu del públicu depués d’amosar el so rexistru. Cola emoción nel puntu más altu del conciertu, llegó’l momentu más reivindicativu, mesmo que d’alcodanza. Rodrigo Cuevas recordó a Alberto Blanco col tema ‘Rambalín’, esi que lu fixo ser Premiu Camaretá al Meyor Cantar nel añu 2020, el de la pandemia. Con esti cantar, recordaba al home qu’asesinaran xustamente va 50 años y lo facía con un discursu de reivindicación de los derechos LGBT.

Cola reivindicación acabó’l segundu de los bloques, separtaos poles publicidaes en formatu vintage de dalgunu de los productos que los asistentes diben poder atopar na tienda habilitada pa ello a la salida del recintu. El terceru de los bloques diba protagonizalu Manual de Romería, anque tamién con cantares del discu que taba presentando. De fechu, esta parte del conciertu empezó con ‘La playa’ y el so «masaxe piloñés» pa depués siguir con Casares, Veleno (que desató en baille al públicu), ‘Xiringüelu ‘o dos de los temes que más lo petaron y lo siguen faciendo anguaño: ‘Cómo ye?!’ y ‘Más animal’.

Con too ello y con Cuevas quedando desnudu dafechu nel escenariu y namás tapáu cola so propia pandereta, remataba’l terceru de los bloques y, previa publicidá aportaben los tres últimos cantares, que facíen de bises. Yeren ‘El día que nací yo, ‘Una muerte ideal’ (que nel discu apaez en collaboración colos gallegos Grande Amore) y ‘La Fiesta’, cola que remató’l desfase de la xente, entregada a la causa de Cuevas en favor de la belleza.

Rodrigo amosó nesti entamu de la xira que se puede cantar n’asturianu y trabayar cola música asturiana dende la modernidá. Nel so conciertu sonó la copla y el trap, l’asturianada y la música de raigañu en total convivencia. Y entregó al públicu otres dos instrucciones que nun tán nos sos manuales publicaos: «¿Qué faes en Coachella si yes de La Felguera? Vete a les fiestes del to pueblu», nuna clara reivindicación de les verbenes y les fiestes de prau asturianes. La segunda de les instrucciones foi la de que facer el «mamarracho» ye lo más importante». Rodrigo Cuevas reinó amosando la belleza de la so música. Y la xira namás ta por empezar.