Raigañu publiquen los trés adelantos últimos del discu ‘Fala con to güela’. El grupu asoleya’l 28 de mayu’l so primer álbum y ‘Tierra entre fosos’, ‘Entre fame y pólvora’ y ‘Xuaquina’ son los avances nuevos. Musicasturiana.com /
El grupu d’agrofolk-rock Raigañu sigue llanzando pasín a pasu los temes que formen parte del so primer discu, Fala con to güela. Güei añaden al llanzamientu que ta disponible en toles plataformes musicales trés temes nuevos: ‘Tierra entre fosos’, ‘Entre fame y pólvora’ y ‘Xuaquina’. «Nesta ocasión entemecemos dos cantares de tonu más seriu con una propuesta más comediante«, desplica Llarvi Varela, vocalista y fundador del grupu, alredor d’estos temes.
«‘Tierra entre fosos‘ fai alcordanza a tola xente que ta enterrada nes foses d’Asturies», desplica’l músicu sobre esti tema punk-rock col protagonismu de la gaita. La memoria histórica tamién ta presente n’Entre fame y pólvora‘, un cantar dedicáu al Conseyu Soberanu d’Asturies de Llión, entidá política soberana que presidió Belarmino Tomás en 1937. «Ponemos asina voz a una dómina marcada pola resistencia, la fame y la llucha«, añade’l músicu.
L’últimu de los temes ye ‘Xuaquina‘, «una historia que cunta con chancia un amor fallíu con Xuaquina, muyer del opus y taurina», desplica Llarvi. Estes trés pieces aporten dempués de los singles ‘Llingua de paletos‘, ‘Fala con to güela‘, ‘Gaites nel Carrefour’, ‘Paisanos mal fechos y ‘Agromoza‘ y reflexen la propuesta del grupu, caracterizada por amestar folk y punk-rock con protagonismu de gaita y presencia de vientos metales. A too elllo súmase la estaya «agro«, por mor de que tolos sos componentes vienen del rural, un mundu que reivindiquen y al que miren nes sos lletres.
Discu y conciertos
El próximu 28 de mayu van llanzar el so primer discu y llueu entamar colos conciertos: 28 de mayu la presentación del álbum na Chalana (Llaviana), 12 de xunu en Blimea, 13 de xunu en Verdicio, 27 de xunu en Suares (Bimenes) y otres feches que tán zarrando. Con Raigañu medra la escena de rock n’asturianu gracies a una banda que sigue’l camín de referentes como Los Berrones, Avientu, Spanta la Xente o Skama la Rede y presenta una propuesta a mediu camín ente toos ellos.
