Chus Solís resucita’l son d’una de les primeres gaites d’Asturies
La talla d’un gaiteru qu’apaez nel pórticu principal de la ilesia de Santa María de la Oliva de Villaviciosa ye una de les primeres representaciones d’una gaita qu’hai n’Asturies. De la mano de l’asociación ‘Canteros del sonido’, l’artesanu gaiteru Chus Solís reconstruyó esti instrumentu del sieglu XIII.
La escena tien llugar nes Asturies del sieglu XIII. Un home toca la gaita en compañía d’un osu. Sofitándose en reconstrucciones 3D de la talla, mui deteriorada pol tiempu y, gracies a un fondu trabayu de documentación, Chus Solís lleva seis meses dando forma a esta gaita medieval.
Ye un instrumentu de vientu con un son distintu a la gaita actual. Pensáu pa ser tocáu n’interiores. El canteru representóla a partir d’una escena cotidiana.
Instrumentos y sones del pasáu qu’aliquen gracies a un trabayu cuasi detectivescu.
