El Principáu empecipia’l procesu para declarar BIC a la Cultura Quesera Asturiana. El Principáu ye’l mayor llurdiu queseru d’Europa, con más de 298 variedaes. La reconocencia aspira a protexer y poner en valor una tradición estrechamente amestada a la gastronomía, la economía y el mediu rural. Actualidá
Asturies cunta con una tradición quesera única. Nesta comunidá ellabórense 298 variedaes distintes, lo que la convierte nel territoriu con mayor concentración de quesos artesanos por metro cuadráu y habitante de too el continente européu. Esta riqueza granible y cultural, frutu de sieglos de conocencia tresmitida de xeneración en xeneración, asitia al sector queseru artesanal como uno de los principales esponentes del patrimoniu gastronómicu, cultural y etnográficu asturianu.
La declaración como BIC pretende reconocer el valor cultural que representen les queseríes artesanes nel caltenimientu de los saberes tradicionales acomuñaos a la ellaboración del quesu, según la so contribución al caltenimientu de l’actividá económica, la fixación de población, el desenvolvimientu sostenible de les zones rurales y la so presencia en diverses manifestaciones culturales.
Esta tradición nun sería posible ensin la fortaleza del sector ganaderu asturianu y el trabayu diariu de les esplotaciones familiares que sostienen la producción de lleche calidable en tol territoriu. La ganadería constitúi’l primer eslabón d’una cadena de valor que da orixe a los quesos artesanos, contribuyendo de manera decisiva al caltenimientu del paisaxe, la biodiversidá y l’actividá económica nel mediu rural.
La reconocencia de la cultura quesera asturiana supon poner en valor el llabor de ganaderos y ganaderes, que’l so compromisu col territoriu y coles práctiques tradicionales resulta esencial pa caltener unu de los principales símbolos de la identidá gastronómica asturiana.
Tres el pronunciamientu del Conseyu del Patrimoniu Cultural, van percanciase los informes preceptivos de les instituciones consultives competentes, ente elles la Universidá d’Uviéu y la Real Academia de la Hestoria. Una vegada completáu esti procesu, el Conseyu de Gobiernu va aprobar, nel so casu, el decretu definitivu de declaración.
Con esta iniciativa, l’Executivu autonómicu refuerza’l so compromisu cola protección y promoción del patrimoniu cultural asturianu y cola reconocencia d’aquelles actividaes que contribúin a caltener y tresmitir un legáu que forma parte de la identidá colectiva d’Asturies.
