El Conceyu Xixón convoca’l XVI Certame de Cuentos y Dibuxos sobre Mediu Ambiente coles aves como temática central. L’oxetivu ye poner en valor la guapura de la nuestra redolada natural y la so biodiversidá, asina como concenciar sobre la importancia del so caltenimientu.
Nesta edición, queremos que les aves qu’habiten los nuestros pueblos y ciudaes, campos y montes, viesques, ríos y mares, sían les grandes protagonistes de los cuentos y ilustraciones.
Convidamos a tolos escollinos participantes a dexar volar la so imaxinación y a descubrinos, al traviés d’histories reales o fantástiques y de los sos dibuxos, el maraviyosu mundu de les aves. Van poder imaxinar histories de convivencia ente aves y persones, cuntanos la so vida cotidiana, ónde viven, cómo se rellacionen y comuníquense, o inspirase na so guapura y singularidá, los sos colores, los sos vuelos, los sos cantares y los sos comportamientos.
Tamién van poder inspirase nel importante papel que desempeñen les aves na naturaleza y nos numberosos beneficios qu’apurren a los ecosistemes y a la nuestra propia vida. Porque conoceles ye’l primer pasu pa valorales, respetales y protexeles.
Una responsabilidá que compartimos toos.
