Anabel Santiago

Anabel Santiago: «Prestáreme poner banda sonora a la revolución d’ochobre de 1934» 

Anabel Santiago ye cantante, articulista de prensa cultural y profesora de cantu tradicional. Lleva más de 25 años dedicada a la renovación del xéneru musical denomináu «tonada» que la lleva a ganar decenes de concursos rexonales, asina como la concesión d’una cai col  so nome na capital d’Asturies, Uviéu, con namás 17 años d’edá. Tien al llombu más de 8 álbumes discográficos propios y más d’una trentena de collaboraciones musicales con artistes de tol país. Con unu de los sos discos, «Agora», consiguió’l Premiu Nacional de la Música nel añu 2012. El so último trabayu «Y andá» da un pasu más allá, y consigue xunir la música lletrónica cola de más raigañu. A día de güei sigue en xira con esti trabayu y prepara’l so siguiente proyectu qu’estrenará en 2021. 

Un llugar pa perdese una fin de selmana… 

El valle del Llagu nel Parque Natural de Somiedu, ye un llugar máxicu, tuvi cantando ellí y amás de que la xente ye mui prestosa,  la visita a cualquier pueblín o a los Teitos ye una esperiencia inolvidable.

Un llugar pa vivir…

Cerquina la costa, Lluanco. Tomar unes botellines nel muelle, picar dalgo coles vistes al mar que tien y dar una vueltina pol paseu de la Ilesia. Y si te queden ganes pues facer la ruta costera dende Moniello hasta’l Cabu Peñes.

Un platu…

Un bon rollu de bonitu, y si ye carne un cachopu de cecina. Anque n’Asturies ye mui difícil decidir que vas comer porque too ta bono. Lo de la nuesa gastronomía ye d’otru mundu.

Un postre…

Los frixuelos (rellenos de dulce de lleche), son la mio perdición. Y si ye de salao, la variedá de quesos d’Asturies que tenemos, dende’l quesu casín pasando pel afumáu de Pría. Delicatessen.

Una playa pa pasar el día…

La playa de Frexulfe (Navia), ye preciosa y nun ta mui masificada. L’occidente tien unes playes poco conocíes que nun envidien nada a la fastera oriental, tamién ye muy prestosa la de Tapia o la salvaxe de Barayo.

Un pueblín que nun podemos dexar de ver…

Espinaréu ye de los más guapu del conceyu de Piloña. Amás lluz los horreós y la decoración floral más cuidaos y guapos de la zona. N’Espinaréu braniaba de neña y tengo recuerdos de lo afayadizu que yera y de la guapura natural que tien. Y pa la xente que-y gusta’l monte, l’área recreativa de La Pesanca y la ruta del ríu Infiernu.

Un chigre pa tomar unos culinos…

«Sidrería La Iglesiona» de Xixón, ye un sitiu céntricu y ta rexentáu por una familia ucrainiana que bien paecen de Felechosa. Ye un exemplu de convivencia cultural y de como una familia emigrante pue amoldase a les nuestres tradiciones. Tienen una cocina pa fartase rico y bien y lo mesmo pues tomar unos culinos que brindar con vodka al glayíu de «Nasdrovia!!

Un parque natural pa visitar…

Parque Natural de Redes en Casu. Naturaleza y belleza van de la mano. Yo criéme ente esos montes y nun hai nengún pueblu que visites ellí que nun t’inunde d’asturianía. Mui a destacar la ruta de Brañagallones con una de les meyores vistes naturales del Principáu, y quedase a descansar nel Refuxu.

Una fiesta a la que nun faltar…

La boda vaqueira d’Aristébanu. Un esperiencia que nengún asturianu ha perder. Ye una sobredosis de tradición, folixa, alcuentru ente la xente d’equí y de fuera. Tuvi la suerte de ser nomada vaqueira d’honor fai dos años y xubir a Aristébanu montada a caballu con tola procesión de xente y la lliturxía qu’acompaña al ritual, ye dalgo difícil d’escaecer.

Un muséu pa recomendar…

El Belles Artes d’Uviéu. Pola so hestoria, porque contién les colecciones más importantes del país y porque les sos instalaciones son impecables. Si a eso sumes que la entrada ye gratuita nun se pue pedir más.

Un momentu de la hestoria d’Asturies que te prestaría vivir…

La revolución d’ochobre del añu 1934. Prestárame poner banda sonora a esi momentu de la hestoria d’Asturies, que foi vinculante y que por desgracia nun se recuerda como habría facese. Asturies y un puñáu de xente valiente lluchando pola so tierra, nun se m’ocurre meyor momentu pa rememorar.

Un baille pa pasalo bien…

El son d’arriba. O cualquier baille tradicional que nos acerque un poquiñín a lo que fuimos y a lo que somos. N’Asturies hai muncha cultura de baille, ye importante perpetuar esi sentimientu, por eso la importancia de la tresmisión oral y nel casu del baille de los conocimientos de los distintos tipos de bailles según zones y estilos.

Una pallabra n’asturianu que te preste…

Charrán/ana. Faime muncha gracia poder llamar eso a dalguién que nun abocana.

Una tradición que nun pue perdese…

La música tradicional asturiana, en concretu la tonada y los cancios de chigre. Por suerte hai un resurdir de xente mozo que canta y mantién vivu esi sentimientu. Y en los chigres y folixes paezme importante que se fomentara la recuperación de dalguna d’estes tradiciones que xunten a la xente y anímenla a cantar ensin mieu amás d’ayudar a consumir nos establecimientos hosteleros. Como exemplu los cancios de chigre de la Pola o Noreña.

Una espresión n’asturianu que te preste… 

«Vamos a entamala». Resume con creces l’espítu astur y cómo ye la xente equí. Escuches esa espresión y sabes que la folixa ta asegurada.