La nueva rotonda de Llugones y La Fresneda yá ye una realidá: asina ye’l planeta allumáu de Siero. El Conceyu estrena l’actuación artística y didáctica n’una rotonda pola que circulen más de 50.000 vehículos al día. El Fielato /
El tresformamientu del accesu ente Llugones y La Fresneda da un nuevu pasu. Dempués d’años d’obres pa conectar dambos núcleos por aciu una pasarela piatonal y una sienda con carril bici incluyíu, el Conceyu de Siero inauguró ayeri la nueva glorieta del AS-17 y l’AS-381, una actuación de casi 600.000 euros que convierte la rotonda nun gran planeta visible dende la redolada de la pasarela.
La intervención caltien el perímetru de la glorieta orixinal, pero incorpora una semiesfera de formigón pintada d’azul sobro la que s’asitiaron los continentes como pieces metáliques a manera de puzzle. El conxuntu completar con llume perimetral y puntos de lluz nes principales capitales del mundu, amás d’una georreferenciación qu’asitia a Siero nel mapa.
L’alcalde, Ángel García, sorrayó que l’actuación busca ameyorar la imaxe d’unu de los accesos más transitaos del conceyu. «Pequí pasen más de 50.000 vehículos diarios y queríamos da-y una estética y un aspeutu que dignificara Siero, lo que somos y lo que queremos ser», señaló. El rexidor recordó que l’oxetivu de toles infraestructures executaes na zona foi «xunir Llugones y La Fresneda» y superar les barreres que xeneren l’AS-17 y l’autopista», dexando per primer vegada una conexón segura pa peatones y ciclistes.
L’arquiteuta Verónica Durán, responsable del diseñu, esplicó que dende l’entamu concibió la glorieta como «un espaciu artístico y didáctico». «Nun queríamos a cencielles una rotonda con árboles. Buscábamos daqué que fixera cavilgar sobro’l planeta y la necesidá de curialo», indicó. Según detalló, el proyectu pretende espertar l’interés de los más nuevos y convertir el percorríu perimetral nuna esperiencia contemplativa.
L’actuación complétase con murales del sistema solar nos llaterales de la infraestructura, integraos nel programa municipal de Muralia. «Quixímos que los neños puedan identificar los nomes de los planetes y que’l conxuntu tenga tamién un valor educativu», añedió Durán.
La resultancia, visible dende la pasarela que xune dambos núcleos, aspira a convertise nun nuevu finxu urbanu de Siero. «De nueche va ser especialmente llamativu», avanzó l’arquiteuta, convencida de que’l llume va dexar apreciar dafechu xuna obra que combina movilidá, arte y sensibilización ambiental na principal puerta d’entrada a Llugones y La Fresneda.
