Edward Burtynsky ‘Agua’ / Dende’l 29 de mayu hasta’l 13 de setiembre
El Centru Niemeyer acueye la esposición ‘Agua’, del reconocíu fotógrafu canadiense Edward Burtynsky, unu de los grandes referentes de la fotografía contemporanea a nivel internacional. L’amuesa, comisariada por Enrica Viganò, axunta una selección d’atanantes imaxes qu’esquicen la complexa relación ente’l ser humanu y unu de los recursos más esenciales del planeta: l’agua. Videu ISA
Colorado River Delta #2. Near San Felipe, Baja, Mexico 2011 © Edward Burtynsky / courtesy Admira, Milano
Col so inconfundible estilu —caracterizáu por grandes formatos, xuna estraordinaria riqueza cromática y xuna mirada que combina estética y reflexón crítica— Burtynsky traviesa los cinco continentes para documentar paisaxes y escenarios onde l’agua ye protagonista d’hestories de tresformamientu, tensión y fraxilidá. Dende vastes infraestructures hidráuliques hasta esplotaciones industriales, pasando por deltes, glaciares y zones afectaes pola seca, el fotógrafu asítianos frente a realidaes a la llende, revistíes, sicasí, d’un poderosu encantu visual.
“Burtynsky consigui faenos cavilgar sobro les temes ingrientes del ambiente con una delicadeza que nun tien comparanza. Nos sos güeyos tán les pintures de los paisaxistes del sieglu XVIII, na alma un amor ensin llendes pola naturaleza, na cabeza tou les informaciones posibles, nel espíritu’l deséu cerbunu d’ameyorar el fututo de los nuesos fíos”, asegura la comisaria de la esposición, Enrica Viganò.
Salinas 3. Cádiz, Spain, 2013 © Edward Burtynsky / courtesy Almira, Bilanu
Burtynsky traviesa los cinco continentes p’afayar y faenos afayar situaciones a la llende, revistíes d’encantu visual. Como les mines de fósforu, que los sos borrafes acaben na agua, alimentando a les algues que quiten osíxenu y atrofien l’agua mesma, pero que crean maraviyosos espeyos azules que fotografiaos estelen a la nuesa mirada con máxicos cromatismos, antes de revelar esta tarrecible realidá.
Pal trabayu de l’agua, Burtynsky valióse de tecnoloxíes avanzaes convertíes n’indispensables pola inmensidá del suxetu. Tomes aérees caractericen la serie y ablúquennos pola dificultá pa prindar la escala visual: “De cutiu el mio enfoque, la compresión del espaciu al traviés de la lluz y l’óptica, tamién produz xuna ambigüedá de la escala. Uno nun sabe lo grande que ye hasta que nun ve un detalle que’l so tamañu puede reconocese”, reconoz Burtynsky.
Con esti trabayu, l’artista desvélanos llugares nos que l’home rompió l’equilibriu de los continuos tresformamientos naturales de los elementos, provocando mancaes nel banduyu de la madre Tierra. Siguió’l cursu de los ríos y estudió los mares, describió los distintos usos de l’agua, dende l’agricultura a l’adoración, y nunca se conformó en llegar namá a la superficie de les coses, como ye’l so estilu.
