«Tu perro lo hace, tú la recoges, la ciudad lo agradece».
Ye’l lema de la nueva iniciativa puesta en marcha pol Conceyu d’Uviéu y FCC Mediu Ambiente pa sensibilizar a la ciudadanía y la promoción del civismu y la tenencia responsable de mascotes n’Uviéu. L’acción, según esplicó ayeri’l conceyal de Servicios Básicos, José Ramón Pando, «naz con un enfoque positivo y educativo, porque creemos que la meyor manera d’ameyorar la convivencia ye concenciar y facilitar ferramientes útiles a los ciudadanos». Recoyer los escrementos de les mascotes ye una obligación, pero tamién «una amuesa de respetu».
Va instalase mientres trés xornaes consecutives, ente’l 15 y el 17 de mayu, un estand informativu na plaza de La Escandalera pa ufiertar a los dueños de mascotes material de llimpieza ya información sobro les obligaciones recoyíes na normativa municipal. El Conceyu va poner a disposición botes pa la llimpieza d’orinos y packs de bolses pa la recoyida d’escrementos. Amás, el personal de la campaña va ufiertar información práctica sobre les normes de convivencia.
En palabres de Pando, «caltener Uviéu llimpio ye una responsabilidá compartida. Con pequenos xestos cotidianos consiguimos una ciudá más prestosa, más saludable y más respetuosa pa toos», concluyó’l conceyal popular.
