Martín López-Vega va coordinar la Selmana de les Lletres Asturianes 2027, una edición dedicada a Xuan Bello. 
La Selmana de les Lletres va estendese nesta ocasión a lo llargo de tol añu con actividaes culturales, publicaciones, alcuentros y acciones divulgatives p’acercar la obra de Xuan Bello a toles xeneraciones y reivindicar el legáu d’una figura esencial de la lliteratura asturiana contemporánea 
Nortes.me /
La designación de Martín López-Vega pon al frente d’esta conmemoración a una de les figures asturianes con mayor proyección cultural y lliteraria internacional, según destacó’l Gobiernu del Principáu.
Nacíu en Poo (Llanes) en 1975, ye llicenciáu en Filoloxía Española pola Universidá d’Uviéu y doctor en Lliteratura pola Universidá d’Iowa. A lo llargo de la so trayectoria desenvolvió una destacada llabor como poeta, ensayista, traductor, críticu lliterariu y xestor cultural.
Amás, ye l’albacea lliterariu de Xuan Bello, responsabilidá que-y foi confiada pola so esposa y la so fía.
López-Vega publicó títulos como Les coraes de la roca, Gótico cantábrico: poemas 2013-2017 o Ábrete, Sésamo: poemes nuevos y escoyíos (1994-2024).
Amás de la so trayectoria lliteraria, ocupó responsabilidaes nel Institutu Cervantes, onde foi director de Cultura n’España y director del gabinete de dirección. Anguaño dirixe la sede de Mánchester.
Tres el fallecimientu de Xuan Bello, en 2025, el Principáu comprometióse a dedicar l’añu 2027 a la memoria y al legáu cultural del escritor de Paniceiros. L’homenaxe a la so figura va incluyir actividaes lliteraries, alcuentros, esposiciones, publicaciones especiales y distintes iniciatives de divulgación destinaes a averar la obra, el pensamientu y la dimensión universal del autor a nueves xeneraciones de llectores y llectores.
Ente les aiciones previstes figura tamién el reconocimientu institucional de la so figura cola denominación del IES La Florida col nome de Xuan Bello a partir del próximu cursu.
Xuan Bello, Uviéu, 2007. Semeya: Pablo Lorenzana.