La rede autonómica, pública y gratuita de Les Escuelines/As Escolias incorpora otros 18 centros municipales y supera yá los 2.000 neños y neñes d’hasta trés años matriculaos. Adrián Barbón: “Con esta iniciativa, Asturies vuelve enseñar el bon camín, una vegada más, a la vanguardia de la meyora del estáu de bienestar”. El presidente del Principáu robló güei los convenios d’integración colos conceyos d’Avilés, Cangas, Castrillón, Cuaña, Grau, Llaviana, L.lena, Mieres, Noreña, Siero, Somiedu, Teberga, Tinéu y A Veiga.
La rede autonómica, pública y gratuita para alumnáu de 0 a 3 años incorpora otros 18 centros municipales y algama yá los 2.069 neños y neñes matriculaos. El presidente del Principáu, Adrián Barbón, encabezó güei l’actu de firma colos 14 conceyos que xestionaben hasta agora estos equipamientos. Avilés va integrar trés escueles; Siero y Castrillón, dos, y el restu, una.
“El proyectu de Les escuelines/As Escolías marca un antes y un dempués na hestoria de la educación n’Asturies. Por fin faise realidá una rede pública, gratuita y autonómica d’escueles infantiles, esa aspiración que tan pocu tiempu tras paecía irrealizable”, valoró’l xefe del Executivu, quien punxo esti proyectu como exemplu de l’ambición y el compromisu” del Principáu cola educación pública, “l’ascensor social más potente qu’esiste”.
“Ye una rede qu’educa, que contribúi a la conciliación y con un altu impactu territorial, porque ayuda a afitar población”, añedió Barbón mientres la so intervención.
Nueves incorporaciones a la rede. Estos catorce conceyos son los que pudieron garantizar, nel plazu fitu pola Conseyería d’Educación, la continuidá del serviciu de comedor escolar de cara al próximu cursu, un requisitu fitu pa encetar la integración, que se va faer efectiva’l próximu 1 de xunu.
Estes 18 escueles municipales suman 71 unidaes y 910 neños y neñes matriculaos. En cuanto al personal, van integrase 185 persones, na so mayoría, técniques d’educación infantil (TEI).
Con esti segundu bloque, yá son 36 los conceyos qu’integraron les sos escueles municipales na rede qu’agora queda compuesta por un total de 65 centros.
Nestos momentos queden pindios d’adhesión les escueles municipales de Cangues d’Onís, Carreño, Xixón, Gozón, Llangréu, Llanes, Uviéu, Pravia, Ribesella, Salas y Samartín del Rei Aurelio.
INTERVENCIÓN DEL PRESIDENTE DEL PRINCIPÁU D’ASTURIES, ADRIÁN BARBÓN
Actu de firma pa la integración de 18 escueles municipales na rede autonómica de Les Escuelines/As Escolías
Este ye un actu cargáu de simbolismu. Ye un actu qu’enseña la fuerza de la constancia y de la voluntá política. Nun fai tanto, la integración de Les Escuelines municipales nuna rede autonómica percibíase como un oxetivu bien alloñáu, prácticamente imposible. Recuerden aquel alderique, encaloráu y tirante n’ocasiones, que se caltuvo vivu mientres delles llexislatures. Güei ta *totalmente superáu gracies al tesón y la voluntá política del Gobiernu d’Asturies.
Tamos falando de fechos, non de promeses. Fai menos d’un añu, n’agostu de 2025, roblamos los primeros alcuerdos d’adhesión con 22 conceyos. Aquella meta tan alloñada convirtióse nun propósitu cumplíu que güei consolidamos con esta segunda robla con otros 14 conceyos.
Esti actu ye un finxu bien importante. A partir del 1 de xunu, la rede autonómica, pública y gratuita va sumar yá 65 centros y 2.069 neñes y neños matriculaos.
Dacuando nun damos cuenta de la importancia de lo que tenemos ante los nuesos güeyos, de lo que tamos construyendo.
El proyectu de Les Escuelines/As Escolías marca un antes y un dempués na hestoria de la educación n’Asturies. Por fin faise realidá una rede pública, gratuita y autonómica d’escueles infantiles, esa aspiración que tan pocu tiempu tras paecía irrealizable.
Ye un exemplu de política útil y de collaboración ente alministraciones, de xuru el más importante d’esta llexislatura. Da respuesta una repitida demanda de los conceyos, qu’encaraben series dificultaes de xestión. A éstes el funcionamientu de la rede cubrise colos impuestos de la población asturiana, lo que demuestra hasta qué puntu son importantes esos recursos y l’usu que dende les alministraciones faemos d’ellos.
Ye una rede qu’educa, que contribúi a la conciliación y con un altu impactu territorial, porque contribúi a afitar población.
Con esta iniciativa, Asturies vuelve enseñar el bon camín, una vegada más a la vanguardia de la meyora del estáu de bienestar.
Güei roblamos la integración na rede de 18 centros municipales xestionaos hasta agora polos conceyos d’Avilés (3 escueles), Cangas, Castrillón (2 escueles), Cuaña, Grau, Llaviana, L.lena, Mieres, Noreña, Siero (2 escueles), Somiedu, Teberga, Tinéu y A Veiga.
Gracies a tolos representantes municipales y a la Conseyería d’Educación por faer posible esti actu. Pero, sobremanera, gracies por collaborar na construcción d’esta rede, pública y gratuita, na que güei se forma l’Asturies de la mañana. Los recursos que dedicamos a esti proyectu suponen un apueste de futuru y una inversión en talentu al llargu plazu.
El Gobiernu d’Asturies tienlo claro: la educación pública ye una de les nueses grandes prioridaes. Nun lo digo col piquín, non; puedo demostralo con fechos. La conseyería cunta anguaño col mayor presupuestu de la hestoria (980,8 millones), a pesar del descensu del alumnáu, porque queremos cumplir, puntu por puntu, tolos compromisos del Pactu Asturies Educa.
Güei damos una reblagada, que nun se quedará solo. En septiembre vamos dar otru saltu de xigante: a partir d’entós, la matrícula universitaria va ser gratuita en tolos cursos, incluyíos másteres oficiales.
Asina, cualquier ñácaru qu’apuerte a una escuela de 0 a 3 va poder cursar toles etapes de la enseñanza, dende’l primer ciclu d’Infantil hasta la Universidá, ensin tener que pagar matrícula. Nun ye maxa, non; llámase estáu de bienestar y finánciase colos tributos de la ciudadanía. Ye una prueba de la nuesa ambición y d’el nuesu compromisu col ascensor social más potente qu’esiste.
