🎶 Marisa Valle Roso, Tania Pereira, Sólo y Ochobre van ser los finalistes del XVIII Premiu Camaretá al Meyor Cantar. La Conseyería de Cultura, Política Llingüística y Deporte anunció güei los cuatro temes que van competir por un gallardón que reconoz y pon en valor la creación musical n’asturianu y n’eonaviegu. La final va celebrase’l próximu 2 d’ochobre nel Teatru de la Llaboral, en Xixón, onde los cuatro artistes van defender los sos cantares en directo. La gala va cuntar amás cola actuación de Ferla Megía, ganador de la pasada edición. 🎤 Cuatro artistes, cuatro estilos y muncha música n’asturianu sobre l’escenariu.#Camaretá #MúsicaAsturiana #CulturaAsturies
Estos son los cuatro finalistes
¡Norabona a 
Tania Pereira Armesto, 
Alfredo González Fláquez, 
Marisa Valle Roso y 
Ochobre, finalistes del XVIII Premiu Camaretá al Meyor Cantar!
Marisa Valle Roso, con ‘La carbonera‘. L’artista llangrana ye una de les voces más reconocibles de la música asturiana. Cantante y compositora, entamó’l so camín dende bien neña nel mundu de l’asturianada y dende hai más d’una década trabaya con otros soníos como la canción d’autor, el pop o la electrónica. Esti cantar ye parte del so discu últimu Cenicientes, dedicáu a la memoria asturiana.
Ochobre, con «Escuela d’amor«. Esti grupu ye’l más destacáu de la fornada nueva de rock astur. La so propuesta entemez soníos como’l punk-rock, el folk asturianu o’l hardcore con unes lletres de calter reivindicativu. Tres más de diez años de trayectoria asoleyaron hai un añu’l so segundu discu, La rabia nos dientes, nel que s’alcuentra esti cantar dedicáu a la escena musical asturiana.
Sólo, con «Foles«. Sólo ye’l proyectu nuevu del cantautor turonés Alfredo González, bien conocíu na escena asturiana y con dellos trabayos publicaos y reconocimientos algamaos. Na so etapa artística nueva presenta una propuesta más íntima y personal, cola qu’esplora rexistros sonoros distintos. Foles ye’l primer cantar n’asturianu que publicó.
Tania Pereira, con «Piquena«. Esta cantautora de Xedré (Cangas del Narcea) lleva faciendo música n’asturianu dende qu’entamó a cantar nel desapaecíu grupu folk Brandal. Na so carrera en solitario, entemez la canción d’autor, l’indie, el pop alternativu y el folk con unes lletres escrites na variante occidental del la llingua asturiana. Esti cantar ta dientro del so trabayu asoleyáu apocayá, Rousa de Xericó.
