Publicado en Deportes, Igualdá, Premios

Premios «Xugamos pola Igualdá» nel deporte

Actualidá /

Cultura convoca los premios ‘Xugamos pola igualdá’, que reconocen el compromisu pa esaniciar les barreres de xéneru nel deporte. Los galardones, dotaos con 30.000 euros, estremen trayectories, proyectos y iniciatives que promueven les mesmes oportunidaes ente muyeres y homes
El plazu pa presentar candidatures va tar abiertu hasta vienres y les propuestes tendrán d’enriase al traviés del Conseyu Asesor de l’Actividá Física y el Deporte.

La Conseyería de Cultura, Política Llingüística y Deporte convocó una nueva edición de los premios Xugamos pola igualdá. Non al machismu, dotaos con 30.000 euros pa reconocer a los que trabayen por que muyeres y homes tengan les mesmes oportunidaes nel deporte. Los galardones ponen el focu en persones, clubes y entidaes que, per aciu la so trayectoria y proyectos, contribúin a amenorgar les desigualdaes qu’inda persisten nel ámbitu deportivu. Los modelos de presentación de candidatures y l’información sobre la convocatoria tán disponibles en https://deporte.asturias.es/.

La convocatoria del 2026 quier visibilizar el trabayu que desenvuelven clubes y escueles deportives tanto nes competiciones como nos entrenamientos. Dende los que fomenten que les neñes sigan practicando deporte hasta los que abren camín al deporte femenino como deportistes, entrenadores o árbitres, pasando peles iniciatives qu’ameyoren les condiciones del deporte practicáu por muyeres, faciliten la conciliación o espublicen los sos llogros.

Los premios distribúyense en cinco modalidaes: deporte base, dirixida a clubes con equipos en categoríes inferiores; trayectoria, que va reconocer a trés deportistes, una entrenadora y una árbitra; conciliación, que pón en valor iniciatives que fomenten la práctica deportiva de les muyeres; estratexa pola igualdá, que valora la equiparación de recursos y condiciones; y espardimientu, enfocada a los que contribúin a dar voz al deporte femenino.

Cualquier persona o entidá interesada pue promover una candidatura, anque la so presentación formal tendrá de realizase al traviés de los vocales del Conseyu Asesor de l’Actividá Física y el Deporte.

El plazu va tar abiertu hasta’l vienres. Pa participar, va ser necesariu cuntar cola aceptación de la persona o entidá propuesta y acompañar la candidatura con una curtia memoria, que dexe conocer la so trayectoria y el trabayu realizáu. Tamién van poder apurrise otros documentos qu’ayuden a acreditar los sos méritos. Cada candidatura va poder presentase a una única categoría.

Una vegada cerráu’l plazu, el conseyu asesor va estudiar les propuestes y va escoyer un máximu de trés finalistes por categoría. La Comisión de Deporte y Muyer, constituyida como xuráu, va ser la encargada d’escoyer a les galardonaes. Pa eso, va tener en cuenta la trayectoria y proyectos desenvueltos, la so contribución a la igualdá y la so capacidá pa sirvir d’exemplu n’otros espacios deportivos.

Creaos nel 2021 nel marcu del Pactu d’Estáu contra la Violencia de Xéneru, los premios Xugamos pola igualdá. Non al machismu reconocen un trabayu que munches vegaes se desenvuelve lloñe de los focos, pero que resulta fundamental pa que cada vez más neñes y muyeres puedan practicar deporte, competir y desenvolver les sos carreres ensin atopar barreres per razón de xéneru.

 

Autor:

Maestra de Llingua Asturiana Colexu Carmen Ruiz-Tilve - Uviéu