La escena de música asturiana sigue sumando nomes nuevos. Güei preséntase a traviés de les redes sociales Ḷḷariega, un tríu nuevu formáu poles cantantes y percusionistes Beatriz de Oliveira (Tinéu), Elena Granda (Ribeseya) y Alba Menéndez (Cuideiru); les trés venceyaes a la música de raigañu dende cuantayá. El so repertoriu ta centráu nos sones y bailles del occidente asturianu y yá tienen trés conciertos el mes qu’entra en Somao, Porrúa y Teberga.
«Ḷḷariega naz de la necesidá de tonar a los raigaños y a les fontes orixinales que nos conecten cola nuestra identidá asturiana», con eses pallabres preséntase esta formación qu’escoyó esti nome porque «la lḷariega yera la cocina tradicional, col fueu en suelu, onde la familia axuntábase pa compartir histories, cuentos, cantares... un espaciu d’alcuentru y de tresmisión de la tradición«, desplica la banda formada por «trés muyeres apasionaes pola música tradicional tresmitida de manera oral«.
Una de les particularidaes de Ḷḷariega ye que’l so repertoriu céntrase en pieces procedentes de distintes zones del occidente d’Asturies, «calteniendo la riqueza y el carácter propiu de los sos sones y bailles«. «Dedicámonos a investigar y afondar nel patrimoniu musical asturianu: visitamos territorios onde la tradición sigue viva, falamos con informantes y estudiamos archivos orixinales pa interpretar los sones y los toques cola mayor fidelidá posible, respetando siempre les estructures del baille tradicional y a les fontes», añade la formación na so fueya de presentación.
Primeros conciertos
Xotes, muñeires, sones d’arriba, dances, rebudixos, cariaos y otres espresiones de la música tradicional tán presentes nos cantares qu’interpreta Ḷḷariega y que d’equí a mui poco van poder sentise en directo. El tríu aporta’l 3 de xunetu en Somao, el 4 de xunetu al Llaciniegu de Porrúa y el 12 de xunetu a la Taberna Narciso de Teberga pa dar unos conciertos colos que tienen un oxetivu bien nidiu: «facer disfrutar al públicu mentanto compartimos la nuestra pasión al empar qu’espardemos, caltenemos y damos-y valir al patrimoniu musical asturianu».
