Claudia Lueje

Claudia Lueje: «Facer sidra casera cola familia
ye una tradición que nun puede perdese» 

Claudia Gutiérrez Lueje ye de Cangues d’Onís  y naz en 1995. Estudió Filoloxía Hispánica (con mínor d’Asturianu), anque ye más conocida por tar acabante ganar una de les carreres de monte más importantes d’España: La Travesera. Una preba que percuerre 74 kilómetros per Picos de gran esixencia téunica. Xunto a esti podium topamos otros bien interesantes nesta temporada del 2021 como’l de la Ultra de Valle de Tena n’Aragón, el de la Ultra Comapedrosa n’Andorra o’l Cainejo en Llion. Con too y con ello pue definise como una filóloga montañera que xune na so vida les sos pasiones: la natura y les lletres.

Un llugar pa perdese una fin de selmana… El pueblín de Sotres (Cabrales), sobre too n’iviernu cuando ta acabante nevar y ta too blanquino y silencioso.

Un llugar pa vivir… ¡Asturies! vivo ente la ciudá (Xixón) y un pueblu de Parres (La Vega), asina que nun sedría quien a decidime por una de les dos vides, la del campu o la ciudá, porque les dos son prestoses y sofiten el mio día a día.

Un platu… güevín con patatines ye, ensin dulda, el platu que meyor me representa. Un postre… el xeláu, pero ¡non cualesquier xeláu! Los artesanos de la confitería Argüelles de Xixón.

Una playa pa pasar el día… nun soi mui de sablera, pero gústami la sablera de Xagón (Gozón) porque lo tien too: ye grandona, tien xente (pero ye soportable), chiringuitos, perbonos recuerdos… anque vas tener que poner procuru pa nun mancate coles piedres.

Un pueblín que nun podemos dexar de ver… ¿ún solu? Al dir tanto al monte conocemos munchos pueblinos bien curiosos, pero agora vienmi a la cabeza Vis, n’Amieva. Un pueblín con una arquitectura tradicional mui guapa y con muncha hestoria al pasar per él la senda del Arcedianu que xunía Llión con Asturies.
Un chigre pa tomar unos culinos… La Caldera, en Cangues d’Onís.

Un parque natural pa visitar… Anque Picos seya’l parque más conocíu y ablucante, encamiéntovos que vos perdáis peles viesques de Ponga, sobre too demientres la seronda y conocer pueblinos como Vivoli, Casielles o Viegu

Una fiesta a la que nun faltar… la verdá que tengo mui poca esperiencia en fiestes… asina que tendré que dicir la del mio pueblu: la Fiesta de San Antoniu de Cangues. 

Un muséu pa recomendar…el Muséu del Pueblu d’Asturies en Xixón o’l Muséu Etnográficu de Grandas de Salime.

Un momentu de la hestoria d’Asturies que te prestaría vivir… ¡el día en que s’algame la oficialidá del asturianu!

Un baille pa pasalo bien… tráeme perbonos recuerdos la danza prima, baillándola cola familia nes fiestes de Xixón na playa San Llorienzu.

Una pallabra n’asturianu que te preste… ¡una nun sé si podré! Asina que voi dicir la que meyor me define: «repunante».

Una tradición que nun pue perdese… facer sidra casero cola familia y los vecinos o la sestaferia. Toles tradiciones qu’impliquen la xunión de la xente paécenmi les más prestoses. 

Una espresión n’asturianu que te preste… préstami muncho la espresión ¿afáyeste? pa dar la bienllegada a daquién, anque tamién soi siguidora de la espresión «tar del tou», que nun suelo sentir con muncha faciliá pero qu’en casa usamos davezu. Asina, si tas mui repunante y yá naide t’aguanta puen diciti «tas del tou, nina», pero tamién si lleves una racha perbona xugando a cualesquier xuegu, o si acabes de gastar munches perres mercando daqué cosa ¡Vamos, que val pa too!