Publicado en Día de...

Alcuentru sobre la convivencia del plurillingüismu en Llaboral Centru d’Arte

El Principáu celebra’l Día Européu de les Llingües con un alcuentru sobre la convivencia del plurillingüismu en LLABoral Centru d’Arte.  La conseyera Vanessa Gutiérrez va inaugurar esti martes en Xixón esti actu abiertu al públicu que va ufiertar miraes variaes sobre la diversidá llingüística y la multiculturalidá. L’alcuentru va axuntar, ente otros, al eurodiputáu Jonás Fernández, al escritor Inaciu Galán y a la propia directora del centru, Semíramis González, y va zarrase cola actuación d’un cuartetu de cuerda de la OSPA.

 

La Conseyería de Cultura, Política Llingüística y Deporte va celebrar el martes viniente, 22 de setiembre, el Día Européu de les Llingües con un alcuentru abiertu al públicu que va aconceyar esperiencies variaes sobre la diversidá llingüística en LLABoral Centru d’Arte y Creación Industrial de Xixón. La cita va empezar a les 19:00 hores y va ufiertar una programación que combina diálogu, lliteratura y música.

La conseyera de Cultura, Política Llingüística y Deporte, Vanessa Gutiérrez, va abrir l’eventu, que va cuntar cola presencia del eurodiputáu asturianu Jonás Fernández, ente otros. L’alcuentru propón mirar la realidá plurillingüe d’Europa dende Asturies y asitiar l’asturianu y l’eonaviegu nesi contestu, les lingües propies coles que la comunidá forma parte d’un patrimoniu européu marcáu precisamente pola so riqueza y diversidá.

L’actu incluye una mesa redonda sobre la convivencia ente llingües, el plurillingüismu y la multiculturalidá, tanto dende l’ámbitu social como dende la creación cultural, onde van participar el subdirector de Política Llingüística, Nicolás Bartolomé; la directora del centru anfitrión, Semíramis González, y el periodista y especialista en llingua asturiana Inaciu Galán.

La celebración asturiana adelántase cuatro díes a la fecha oficial del Día Europeo de les Llingües, que se conmemora cada 26 de setiembre. La iniciativa nació nel 2001, a lo llargo del Añu Européu de les Llingües promovíu a comuña pol Conseyu d’Europa y la Unión Europea, y dende entós convirtióse nuna cita anual pa poner en valor la diversidá llingüística y cultural, favorecer l’aprendimientu d’idiomes y l’entendimientu ente cultures y recordar la importancia de protexer el patrimoniu llingüísticu européu.

Europa cunta con más de 225 llingües autóctones, a les que se sumen les munches que formen parte de la sociedá europea como resultáu de los movimientos migratorios. Dientro d’esi mosaicu, l’asturianu y l’eonaviegu tán vinculaos dende va sieglos al territoriu, la cultura y la vida de xeneraciones d’asturianos y asturianes y formen parte d’un patrimoniu que se caltién vivu al traviés del so aprendimientu, el so usu y la so tresmisión. Dambes llingües tán, amás, incluyíes nel marcu de protección de la Carta Europea de les Llingües Rexonales o Minoritaries.

Poesía y música pa zarrar la celebración

La última parte del alcuentru va treslladar esa diversidá al terrén de la creación. La escritora Sofía Castañón va facer delles intervenciones poétiques, que se van alternar coles pieces musicales interpretaes por un cuartetu de cuerda de la Orquesta Sinfónica del Principáu d’Asturies (OSPA), nun zarru concebíu como un diálogu ente palabra y música.

El programa va rematar cola interpretación de la Oda a la Alegría, l’himnu européu. La celebración va zarrar asina un percorríu que parte de la reflexón sobre la convivencia ente llingües y desemboca na creación y reivindica la diversidá llingüística como un patrimoniu vivu y compartíu, amás de recordar que cada xeneración qu’aprende, utiliza y tresmite una llingua contribuye tamién a conservala.

🌍 Cultura celebra’l Día Européu de les Llingües con una xornada qu’axunta palabra, música, arte y creación dixital en LLABoral. La conseyera de Cultura, Política Llingüística y Deporte, Vanessa Gutiérrez, condució un alcuentru dedicáu a la diversidá llingüística europea y al llugar del asturianu y l’eonaviegu dientro d’esi patrimoniu común, col diálogu, la poesía y la música como protagonistes.
Una celebración que mira a les llingües como una ferramienta viva pa crear, compartir y conectar disciplines, xeneraciones y territorios.

Autor:

Maestra de Llingua Asturiana Colexu Carmen Ruiz-Tilve - Uviéu