La OSPA celebra’l ‘Conciertu de Les Lletres Asturianes col estrenu mundial de dos obres de J. Muñiz y G. Martínez n’Uviéu. El programa, dirixíu por Marco Antonio García de Paz y cola actuación del Coru El León de Oro, rinde homenaxe a la cultura y la llingua asturianes. Les entraes gratuites pueden llograse na web www.ospa.es y na taquilla del Auditoriu Príncipe Felipe, del 27 al 30 d’abril, n’horariu de 09:30 a 14:00 hores.
El conciertu va tener llugar a les 20:00 hores nel Auditoriu, con un marcáu calter históricu al acoyer dos estrenos mundiales. Per un sitiu, va presentase la Missa Novus Orbis, de J. Muñiz, una obra de nueva creación que s’incorpora al repertoriu coral contemporaneu. Coles mesmes, va interpretase la Sinfonía nº 1 para coru y orquesta, de G. Martínez, una partitura qu’amplía l’horizonte sinfónicu dende una perspectiva coral. El programa complétase con obres de J. Domínguez y J. Elberdin, lo que convierte’l conciertu n’una propuesta artística de gran riqueza y diversidá.
García de Paz ye unu de los directores corales más reconocíos del panorama nacional ya internacional. Fundador y director del Coru El León de Oro, desenvolvió una intensa trayectoria artística con esta formación, llogró numberosos premios en certames internacionales y consolidó un proyectu de referencia nel ámbitu coral. El so llabor destaca pola excelencia interpretativa y pol espardimientu del repertoriu coral en distintos contestos, tantu sinfónicos como a capela.
