Adrián Barbón: “Gracies a Nacho Fonseca delles xeneraciones d’alumnos asturianos averáronse, nel colexu, a la llingua de los nuesos güelos”. El presidente del Principáu participó nel teatru Xovellanos de Xixón na 13 edición de Cantar Presta Muncho, qu’homenaxó al maestru y compositor sierense. Actualidá /
Adrián Barbón, resaltó’l legáu del maestru y compositor Nacho Fonseca, que güei recibió un homenaxe na 13 edición de la gala Cantar Empresta Muncho, un certame de coros escolares entamáu pol Conceyu de Xixón nel Teatru Xovellanos. “Gracies a él, xeneraciones d’alumnos asturianos averar a la llingua de los nuesos güelos. Yo tamién canté munches d’estos cantares”, esplicó’l presidente.
La gala centróse nesta edición na figura de Fonseca, qu’anguaño va recibir la Medaya d’Asturies. Asina, los ocho coros escolares que participaron, acompañaos por destacaes figures de la música como Xune Elipe, Silvia Quesada, Marta Elola o Miguel Fernandi interpretaron el repertoriu del maestru y compositor polesu. “Quería tar equí polos neños y neñes”, sorrayó’l xefe del Executivu autonómicu, “porque sois la grana que va faer fructificar la llingua de los nuesos antepasaos. Pero tamién por una cuestión de xusticia: estimar el so llabor a Nacho Fonseca”.
Barbón, que cola so presencia nel Xovellanos fixo un altu na so axenda, marcada pola visita del Papa Llión XIV a España, aprovechó tamién pa reivindicar valores como l’amor y el respetu, y p’espresar l’arguyu de formar parte de daqué bien grande que se llama Asturies”.
El Teatru Xovellanos de Xixón acoyó’l domingu 7 de xunu la 13 edición de Cantar Presta Muncho, una iniciativa pensada pa favorecer la creación de coros nes escueles de Xixón y pa que l’alumnáu s’avere a la música coral y tradicional d’una manera cenciella, abierta, activa y participativa. Per muncho años, Nacho Fonseca foi’l coordinador d’esti proyectu que nesta edición fíxo-y un homenaxe al mayestru cola interpretación de temes de Xentiquina y la collaboración de varios artistes de la música asturiana. El resultáu foi una emotiva gala de cuasi dos hores de duración que yá pue vese completa en YouTube.
Miguel Fernandi ‘Burilo’, Silvia Quesada, Marta Elola y Cristina Gestido, Ambás ya Ramsés, Pauline en la Playa, Xune Elipe, Vero Rubio, David Varela y Esther Fonseca foron los artistes encargaos de poner voz xunto al alumnáu de los colexos Xovellanos, Clarín, Laviada, Severo Ochoa, La Milagrosa, Cabueñes, García Lorca y Santa Olaya. Ente toos y toes -amás d’un coru de profesores- interpretaron dellos de los himnos de Xentiquina acompañaos d’una banda formada por Alicia Álvarez a la guitarra- tamién coordinadora del eventu-, Eva Toca a la batería, David Casillas al contrabaxu y Cristina Montul a los teclaos.
L’actu presentáronlu Esther Fonseca y Miguel Ánxel Montenegro y nél intervino tamién el presidente d’Asturies, Adrián Barbón, y la conceyala de Cultura, Montserrat Moro qu’agradecieron a Nacho Fonseca’l so llabor pa esparder la llingua y cultura asturianes ente milenta rapacinos y rapacines a lo llargo de varies décades. La emotividá tuvo presente a lo llargo de tola gala, que remató col interpretación coral del ‘El Carmín de La Pola’ por toles persones que xubieron al escenariu del Teatru Xovellanos. Un eventu que queda pal recuerdu y que va poder vese siempre n’Internet gracies al videu publicáu agora en YouTube pola estaya de Cultura y Educación de Xixón, organizadora del eventu.
Aula de Música en Lieres
Nun foi esti l’únicu reconocimientu que llevó Nacho Fonseca la selmana pasada. El CEIP Xentiquina Lieres-Solvay -onde punxo clase y creó Xentiquina- inauguró l’Aula de Música que dedicó’l so nome a esti mayestru yá xubiláu. Ye un reconocimientu que coincide tamién cola recién concesión de la Medalla d’Asturies por parte del gobiernu asturianu a esta persona clave pa la educación, la cultura, la música y la normalización llingüística
