L’astronauta de los Estaos Xuníos Christina Koch, una de les tripulantes de la misión Artemis II de la NASA que n’abril fizo historia al orbitar la Lluna, poniendo fin a más de mediu sieglu ensin presencia humana nel satélite natural, foi galardonada esti miércoles col Premiu Princesa d’Asturies de la Concordia 2026.
Koch (Grand Rapids, Michigan, 1979) ye inxeniera eléctrica y física y convirtióse na primer muyer en llegar a la órbita del satélite y tamién ye la que tuvo más tiempu de contino nel espaciu, a lo llargo de 328 díes ente 2019 y 2020.
L’astronauta tamién protagonizó en 2019, xunto a Jessica Meir, el primer paséu espacial fechu dafechu por muyeres.
Koch formó parte xunto a los astronautes Reid Wiseman, Victor Glover y Jeremy Hansen de la misión Artemis II qu’acabó’l 10 d’abril pasáu con éxitu la so misión de llevar nuevamente al ser humanu a la órbita llunar per primer vegada dende 1972.
La tripulación superó’l récord de distancia algamada nel espaciu pola misión Apolo 13 en 1970 y afitó, cola nave Orión, una nueva marca al alloñase 406.771 kilómetros de la Tierra.
