El llibru Prau, de Daniel García Granda y Ester Sánchez, publicáu por Pintar-Pintar Editorial, foi seleccionáu pa formar parte de la Coleición IBBY-UNESCO de llibros notables pa llectores mozos en llingües indíxenes y en peligru d’estinción. Formientu / Enllaz noticia
Ún de los aspectos fundamentales de Prau ye que nun se trata d’una obra creada n’otra llingua y traducida dempués al asturianu. El llibru nació, foi escritu, ilustráu, diseñáu y publicáu orixinalmente n’asturianu. La llingua
nun funciona como un añadíu: forma parte del ritmu, de los xuegos verbales, de les imáxenes y de la rellación ente pallabra y páxina.
El testu de Daniel García Granda avérase a la poesía ensin quedar zarráu nuna estructura estrófica ríxida. Xuega cola sonoridá, les asociaciones y les metáfores. Les ilustraciones y el diseñu d’Ester Sánchez prollonguen esi xuegu: dacuando testu ya imaxe avancen na mesma dirección y otres veces abren llectures paraleles.
El resultáu ye un llibru nel que la edición forma parte de la llectura. Pallabres, imáxenes y composición gráfica constrúin una socesión de ‘praos’ distintos, reconocibles y, al empar, imaxinarios.
- Más información y dosier n’asturianu (.PDF)
- Dosier en castellano (.PDF)
- «Prau» lleva l’asturianu a la Coleición IBBY-UNESCO
La Coleición, presentada nel 40.º Congresu Mundial d’IBBY n’Ottawa, axunta 169 títulos en más de 152 llingües, escoyíos ente cerca de 500 llibros procedentes de tol mundu.
Pa nós, la noticia tien amás una dimensión especialmente importante: Prau ye l’únicu llibru n’asturianu de la Coleición y l’asturianu ye la única llingua propia d’España representada.
Y hai entá otru datu escepcional: Pintar-Pintar ye la única editorial con sede n’España presente nel catálogu, y ta representada con dos títulos. Xunto a Prau foi seleccionáu tamién Dos casas, una isla, de Virginia Read Escobal y Taína Almodóvar, proyeutu editorial realizáu por Pintar-Pintar pa la Embaxada de la República Dominicana ante’l Reinu d’España.
La Coleición va tener amás percorríu internacional: va quedar depositada de manera permanente na Biblioteca de la UNESCO en París, va contar con conxuntos itinerantes y va tar presente, ente otres cites, en Fráncfort 2026 y Bolonia 2027.
Y nós nun podemos evitar pensalo: oxalá dalguna d’eses esposiciones pueda llegar tamién a Asturies.
Distribución global de los 169 títulos: 24 · África, 16 · Asia, 38 · América Central, del Sur y Caribe, 12 · Árticu, 29 · Europa Central y Oriental, Rusia, Asia Central y Transcaucasia, 26 · América del Norte y 24 · Pacíficu
