- Alborecemos col cielu cubiertu y dalguna precipitación alrodiu del cabu Peñes y na fastera más oriental d’Asturies con una temperatura actual sobre los 17ºC, rexistrándose nel puirtu Payares 12,5ºC. Les últimes actualizaciones de los modelos meteorolóxicos barrunten la posibilidá de qu’una dana que surde d’una pequeña vaguada sobre’l Cantábrico mos puea dexar precipitaciones mui fuertes en dellos puntos d’Asturies de cara a esta tarde y mañana domingu. La situación ye tan impredicible qu’a menos de 24h ningún modelo coincide con otru y a ca salida mueven hacia un lláu o a otru, lo gordo de les precipitaciones.
- Tar sollertes a les previsiones meteorolóxiques qu’anque lo más probable ye que quede en na, hai posibilidaes de forma llocal que podamos tener precipitaciones de calter tormentosu y mui fuertes en dalgún puntu d’Asturies les prósimes 48h. El Tiempu n’Asturies.
Per otru lláu esa dana va facer d’atractora pa que una nueva vaguada mos afeute de cara al miércoles y xueves pero esta nun s’estrangula sobre nosotres y abre un pasillu de vientu norte que mos apurrirá precipitaciones abondoses y xeneralizaes en toa Asturies , amás d’un descensu bultable de les temperatures.
La fin de selmana viniente paez que va tar más estable con nubes ya claros o abancios nel cielu y con temperatures alcordes coles feches nes que mos atopamos.