✨La obra representa a una pareya de caminantes de 1,90 metros d’altor y ta realizada en bronce pola escultora Sara Iglesias. Asina ye la nueva escultura d’Uviéu qu’homenaxa a los pelegrinos de mano de la ceadora de la escultura de ‘Rufo’.
Uviéu incorpora dende esti vienres una nueva referencia venceyada a la so tradición xacobea. En Foncalada, a los pies de la histórica fonte prerrománica, l’espaciu acueye la escultura ‘Los pelegrinos del Camín de Santiago’, una obra de la pintora y escultora uvieina Sara Iglesias que representa a un home y una muyer afatiaos con ropajes d’inspiración clásica. La instalación, promovida pola Asociación Asturlleonesa d’Amigos del Camín de Santiago cola collaboración del Conceyu d’Uviéu, busca rindir homenaxe a los miles de pelegrinos que, dende va sieglos, traviesen Asturies camín de Santiago de Compostela.
Los dos figures, d’aprosimao 1,90 metros d’altor, fueron concebíes para representar l’esfuerzu, la humildá y la devoción acomuñaos al Camín. Asitiaes al pie de la Fonte de Foncalada, van dexar que pelegrinos, visitantes y vecinos puedan contemplar de barganal estes figures n’unu de los enclaves más venceyaos a la hestoria xacobea de la ciudá.
De les maquetes d’arcilla al bronce. El proyectu escultóricu empezó nel taller que Sara Iglesias tien n’Uviéu. Ellí, l’artista empecipió’l procesu col diseñu y l’ellaboración de pequenes maquetes que darréu fueron desenvolviéndose por aciu el modeláu en magre/arcilla hasta algamar les dimensiones y formes definitives.
Una vegada terminaos los modelos, les escultures fueron fundíes en bronce por aciu el procedimientu tradicional de la cera perdida nos talleres de Bronces Artísticos de Madrid. Tratar d’una técnica artesanal que rique distintes fases y dellos meses de trabayu hasta llograr les pieces finales.
