Primer marcáu de pitos de frangüesos nacíos en llibertá en Los Picos d’Europa
La Fundación pal Caltenimientu del Frangüesos (FCQ poles sos sigles en castellanu) llevó alantre’l primer marcaxe científicu de dos pitos de frangüesos nacíos en llibertá nel Parque Nacional de Los Picos d’Europa.
L’actuación, desendolcada cola collaboración d’especialistes de monte de la Guardia Civil (GREIM), la Unidá Aérea d’Asturies y Axentes del Mediu Natural, dexará algamar información «clave» pal siguimientu y caltenimientu de la especie, informó la fundación.
La FCQ llevó alantre esta selmana los llabores d’accesu a dos ñeros, chequéu veterinariu y el primer marcaxe de dos pitos nacíos en llibertá na presente temporada reproductora nel Parque Nacional de Los Picos d’Europa.
Ye un «acontecimientu de gran relevancia pa evaluar la evolución de la población reproductora y l’éxitu de los esfuerzos de recuperación desendolcaos nes últimes décades n’El Cordal Cantábricu».
Los pitos vienen de dos de les pareyes reproductores de frangüesos afitaes anguaño en Los Picos d’Europa, ún d’ellos correspuende a la pareya formada por Niebla y Biziele, afitada na vertiente cántabra del macizu, mientres que’l segundu vien de la pareya formanda por Cares y Covadonga, afitada na asturiana.
Na intervención, los dos pitos fueron sometíos a una evaluación veterinaria pa comprobar el so estáu sanitariu, desendolcu y condición física y procedióse a la toma de diferentes parámetros biométricos y muestres biolóxiques d’interés científicu, asina como al so marcaxe individual y la instalación d’emisores GPS d’última xeneración a ún d’ellos, porque l’otru taba entá completando la fase de medría.
La información algamada mediante’l siguimientu dexa conocer aspectos esenciales de la ecoloxía de la especie, como los movimientos d’espardimientu xuvenil, la utilización del territoriu, la selección d’hábitat, la supervivencia de los exemplares y les amenaces a les que s’enfrenten nes primeres etapes de la so vida.
Los datos compilaos resulten «imprescindibles pa evaluar la evolución demográfica de la población cantábrica y pa orientar les midíes de xestión y caltenimientu que dexen afitar una población vidable y autosostenible nel conxuntu d’El Cordal Cantábricu», según la fundación.
