Alicia, la estudiante asturiana de 17 años que se convirtió n’astronauta per un día: «Ye bien difícil describilo porque ye una esperiencia única». Trenta alumnos escoyíos pola Axencia Espacial Española probaron un vuelu a gravedad cero, ente ellos la moza uvieina: «Nun tienes control sobre nada, pero coles mesmes sientes una gran paz y, nel mio casu, bien de allegría». LNE
A los sos 17 años, Alicia Fernández tien claro escontra ónde quier dirixir el so futuru. Ye estudiante de Segundu de Bachilleratu tecnolóxicu nel IES Doctor Fleming d’Uviéu y la so vocación apunta alto: «Gustaríame estudiar inxeniería aeroespacial», afirma con seguridá. Pero antes inclusive de triar una universidá, la moza yá vivió una esperiencia que munchos solo imaxinen: llexar en gravedá cero.
Fernández foi una de les escoyíes pola Axencia Espacial Española pa participar nel proyectu educativu «Astronauta per un día», impulsáu pol Ministeriu de Ciencia, Innovación y Universidaes. Un programa pioneru que dexó a 30 estudiantes esperimentar condiciones similares a les del espaciu gracies a un vuelu parabólicu que tuvo llugar esti miércoles na Base Aérea de San Javier (Murcia). «Foi maraviyosu. Ye bien difícil describilo porque ye una esperiencia única», resume.
Esta iniciativa tuvo como oxetivos fomentar les vocaciones científiques y tecnolóxiques ente los mozos, promover l’interés poles ciencies y tecnoloxíes del espaciu, y averar la esperiencia espacial a la sociedá. Anque Fernández tienlo claro dende pequeña. «Siempres quixi ser astronauta, que ye lo típicu que dicen los neños, pero nel mio casu cumplí’l suañu», sonri.
Un procesu esixente El camín hasta esi vuelu nun foi fácil. «Enteréme de que taben ufiertando’l proyectu por una charra que tuvimos nel institutu», recuerda la nueva. «Unvié’l mio espediente académicu xuntu con una solicitú y un cuestionariu inicial», esplica.
Superada esa fase, (na que tolos solicitantes siguieron, yá que nun s’algamara la llende de 500 places) llegó’l verdaderu filtru: un vídeu falando sobre ella. «Teníes qu’esplicar quién yeres, qué te gustaba, por qué queríes participar… Falar un pocu del espaciu y de ti mesmu», asegura. De los 480 vídeos unviaos, solo 40 estudiantes fueron escoyíos.
Tres ello, fixéron-yos una prueba médica de la que finalmente salieron 25 bachilleres y 5 universitarios. «Esos fuimos los que fiximos el vuelu», celebra. La esperiencia tuvo llugar nun avión adaptáu, capaz de xenerar periodos de microgravedad por aciu maniobres parabóliques. «Per fora ye como un avión normal, pero per dientro ye un pasiellu enorme, acolcháu, con redes y barres», describe.
El momentu álgido llega cuando l’aeronave camuda sópito de trayectoria. «Pases de tar a 2G y doblar el to pesu a de sópitu tar en 0G y empezar a llexar», asegura. Llueñe de resultar apavoriante, Fernández viviolo con ilusión: «Más que mieu sientes como un neñu pequenu. Nun tienes control sobro nada, pero coles mesmes sientes una gran paz y, nel mio casu, bien de allegría».
El grupu participante dientro del avión. / LNE
La maniobra dura apenes 20 segundos, pero’l tiempu paez espurrise: «Anque paeza mentira podíes faer un montón de coses como dar cucurrabucos, cruciar la cabina o xugar con burbuyes d’agua». Una de les imaxes que más-y impactó foi precisamente la de l’agua. «Quedábase llexando en forma d’esfera perfecta y podíes dixebrar gotines y bebeles… Yera perrraru», rise.
Programa educativu El programa nun se llindó al vuelu. Mientres trés díes, los participantes convivieron con espertos del sector, incluyendo astronautes. Ente ellos, el veteranu francés Jean-François Clervoy, que viaxó trés vegaes al espaciu. «Dixo que’l vuelu yera esactamente lo que se sentía nun viaxe real», asegura, eufórica.
Lo que más ilusión -y fixo foi conocer a Pablo Álvarez y Sara García, los dos astronautes españoles. «Gustóme enforma conocer a Pablo porque amás él estudió la inxeniería qu’a mi me gusta y na Universidá de Llión, que ye a la que quiero dir yo», esplica.
Anque Fernández caltien los pies na tierra. «Ser astronauta encantaríame, pero ye bien complicáu. Na última convocatoria escoyeron a 12 persones de 25.000», llamenta. Por eso, contempla otres víes dientro del sector: «Gustaríame diseñar cohetes, satélites o aviones».
Una esperiencia difícil d’escaecer que, más allá de l’anécdota, dexa buelga en quien la vive. Alicia Fernández yá probó, anque sía per unos segundos, lo que significa desafiar a la gravedá. Agora, de vuelta a les aules, sigui construyendo pasu a pasu’l camín que lu avere, dalgún día, a ese mesmu cielu que yá empezó a esquizar.
