Gaiteros del Carbón somos una banda de les cuenques mineres qu’en 2026 facemos 10 años. Queremos celebrar esti aniversariu como se merez, con un conciertu especial, una esposición que recueya la nuesa historia, y unos detalles conmemorativos pa recordar esti camín.
La banda, qu’amiesta la música cola minería, defínese como un grupu comprometíu con Asturies
«Cuando un proyectu ye honestu y ta enraigonáu nel territoriu,
la xente siéntelo como propiu»
con una esposición y dos pases d’espectáculu únicu pal que nun queden entraes.
Diez años pasaron dende que l’alumnáu de gaita y tambor de la Escuela de Música d’A Mansalva desfilara na cabalgata de los reis magos de Llaviana nuna carroza que facía un homenaxe al Pozu Carrio. Fueron vestíos de prieto, con cascos de mina que-yos dexó xente de la redolada venceyada a la minería, tocaron dellos villancicos, y esto quedó reflexao nuna semeya que Pablo Carrera -responsable d’A Mansalva y director de la banda- xubió a les sos redes sociales xunto a la frase “Equí tán, estos son, los gaiteros del Carbón”; faciendo asina un paralelismu col “Equí tán, estos son, los mineros del Carbón” que se glayó na marcha negra de la minería que se fizo en 2012 a Madrid. La ilusión, l’enfotu, el disfrute y una serie de circustancies fixeron que de manera “mui natural” fuera encadarmándose esta formación qu’esti sábadu 10 de xineru celebra diez años con un espectáculu únicu.
Con toles entraes vendíes pa los dos pases (unu a les 17.30h y otru a les 20.30h) el Teatru José León Delestal de La Felguera (Llangréu) va acoyer esti conciertu nel que collabora Hevia, Nuberu, José Manuel Tejedor, Xune Elipe (Dixebra), Marisa Valle Roso, Víctor Manuel y Celtas Cortos. Tamién van tar acompañaos por Rubén Bada (guitarres), Juanjo Díaz (batería y percusiones) y Ramón Prada (teclaos y baxu), que s’encarga, xunto col director de la banda Pablo Carrera, de los arreglos y la dirección musical. Amás, va haber dalguna sorpresa y a 16.30h -una hora enantes del primer pase- va inaugurase nel hall del teatru la esposición del X Aniversariu de Gaiteros del Carbón na que va vese“unos maniquís que reflexen la evolución de la indumentaria, semeyes, instrumentos, recortes de prensa… un retratu emocional del proyectu qu’amuesa cómo foi construyéndose la formación”, desplica Pablo Carrera, añadiendo que van intentar “que pueda continuar espuesta durante un tiempu nel teatru pa que la xente que quedó ensin entrada pueda vela”.
«Ye un procesu mui llargu, esixente, pero la verdá que mui prestosu, porque día a día, ves a los componentes más implicaos, más ilusionaos y nun ye fácil qu’haiga esi nivel d’implicación teniendo en cuenta que son xente mui mozo y que tán sacrificando munchu tiempu de la so vida personal y d’ociu»
“Yo tenía claro que Gaiteros del Carbón podría llevar a escena un espectáculu diferente y con identidá y nesti sen fuimos trabayando en cómo enfocar el repertoriu y los arreglos; cómo enfocar los diseños d’iluminación -que xueguen un papel mui importante nel espectáculu- y tomando decisiones qu’ayudaren a materializar el proyectu”, comenta Carrera sobre una idea que-y lleva “rondando pela tiesta más de dos o tres años” y que “fai unos cinco meses” garró puxu pa dar forma a lo que se va ver esti sábadu: “fueron meses de munchísimu trabayu, porque implica ponelo too n’orden, coordinar a los artistes convidaos, los arreglos, la producción, llevamos tres meses ensayando varios díes y los domingos facemos ensayos de 4 o 5 hores pa dexalo too mui bien matizao… Ye un procesu mui llargu, esixente, pero la verdá que mui prestosu, porque día a día, ves a los componentes más implicaos, más ilusionaos y nun ye fácil qu’haiga esi nivel d’implicación teniendo en cuenta que son xente mui mozo y que tán sacrificando munchu tiempu de la so vida personal y d’ociu”. Sicasí, como sorraya’l director “la calidá humana, non namás la musical” ye tamién una de les señes d’identidá de la banda.
Colectivu cultural
“Nun somos una banda al usu pensada p’actuar nun circuitu determináu, sinón qu’entendemos que tamién somos un colectivu de música qu’entiende la música como una ferramienta cultural”. Asina ye como Pablo Carrera define otra de les característiques de la formación que dirixe y por ello defendió en tou esti tiempu “non facer namás un repertoriu de música tradicional o folk, sinón beber d’otres fontes y de grupos de la redolada como Nuberu, Dixebra, Los Berrones… faciendo adaptaciones d’esi repertoriu porque son temes que conoz muncha xente y colos que nos sentimos mui identificaos”. Esto va vese reflexao nes pieces que van interpretar esti sábadu y nes qu’andechen dellos de los músicos más destacaos del país y que más influyeron a Gaiteros del Carbón. Carrera dedica pallabres y agradecimientos pa toos ellos: Marisa Valle Roso -”una artista lletres mayúscules”-; Chus Pedro y Manolo Peñayos de Nuberu -”que son la banda sonora de les cuenques mineres”; Víctor Manuel -”la figura más relevante que tenemos n’Asturies”-; Xune Elipe de Dixebra -”que tien esi poder reivindicativu que tanto conecta cola nuestra personalidá”; José Ángel Hevia -”que revolucionó la gaita nos 90-; José Manuel Tejedor -”referencia de la música folk y tradicional”; y Celtas Cortos -”que nos dieron la oportunidá de tocar con ellos un par de veces y tenemos una manera d’entender la vida mui parecida, con unos valores comprometíos”. A la fin, son una serie de figures que xuben al escenariu del José Delestal “ensin forzar”, porque lo que representen “encaxa perbién” con Gaiteros del Carbón: “conecta col nuestru discursu, cola nuestra música… Tán comprometíos cola tierra, caún aporta la so personalidá y constrúi un diálogu ente delles xeneraciones y estilos”.
«Creo que nun hai precedentes, nel circuitu de les bandes de gaites, de dalgunes de les coses que vamos facer esti sábadu; sobre manera cola puesta n’escena, la iluminación, o los arreglos»
“Creo que nun hai precedentes, nel circuitu de les bandes de gaites, de dalgunes de les coses que vamos facer esti sábadu; sobre manera cola puesta n’escena, la iluminación, o los arreglos -nos qu’hai una parte electrónica que tamién xuega un papel importante-”, camienta’l director de Gaiteros del Carbón. Tamién sorraya’l llabor desendolcáu polos músicos que los van arrodiar: “Cuando Ramón Prada aceptó facer arreglos y encargase de la producción musical y de dirixir a la banda músicos foi una sorpresa y allegría tremenda, porque ye un músicu y productor de primerísimo nivel. Y dempués que Juanjo Díaz y Rubén Bada se sumaren ensin pensalo nin cinco segundos, pues más de lo mesmo”. “Ye un lluxu tener los técnicos de soníu, d’iluminaciones, d’escenariu, de producción que vamos tener con nós”, añade Carrera destacando’l componente colectivu y el trabayu n’equipu que dan forma a un espectáculu únicu que namás va poder vese nesti formatu y con collaboraciones esti sábadu en La Felguera. Sicasí, el director de la formación ve posible “poder facer cierta adaptación del conciertu independientemente de qu’haiga artistes convidaos pa interpretalo más vegaes a lo llargo l’añu si dientro del públicu hai unos cuantos programadores que consideren que ye interesante pa formar parte de los ciclos o festivales qu’organicen”.
Ciñu y arguyu
Con toes estes blimes Gaiteros del Carbón van festexar a lo grande una década na que tienen actuao en “trails, rallys, bodes, premios, festivales, cabalgates… munchísimes coses” y siempre con una cosa mui clara: “tamos mui arguyosos de ser d’onde somos, de la cuenca minera, y tenemos una manera determinada d’entender el mundu”. Esto refléxase nel ciñu recibíu por parte de la xente y afítase en fechos como la exitosa campaña de crowdfunding -que cuasi dobló la recaudación del oxetivu inicial plantegao– o agotar entraes dos veces pa esti sábadu en tan poco tiempu. Ye daqué que, según Carrera, “demuestra que cuando un proyectu ye honestu y ta enraigonáu nel territoriu, la xente siéntelo como propiu”.
«Si tuviéramos l’afán de ser una formación con munchos componentes o la más grande d’Asturies, valdríanos con llevantar el teléfonu y ponenos a llamar gaiteros; pero Gaiteros del Carbón naz de la cantera de la Escuela de Música y siguimos nutriéndonos d’esa cantera. Somos una familia, cuidámonos ente nós, tenemos mui claros los nuestros oxetivos y esto póngolo mui en valor»
Precisamente, la honestidá ye parte de la filosofía d’esta formación de la que Pablo Carrera valora “la continuidá, porque nun ye fácil aguantar un proyectu colectivu diez años ensin perder la esencia” y la “política de funcionamientu”: “si tuviéramos l’afán de ser una formación con munchos componentes o la más grande d’Asturies, valdríanos con llevantar el teléfonu y ponenos a llamar gaiteros; pero Gaiteros del Carbón naz de la cantera de la Escuela de Música y siguimos nutriéndonos d’esa cantera. Somos una familia,cuidámonos ente nós, tenemos mui claros los nuestros oxetivos y esto póngolo mui en valor; más que la presencia n’escenarios importantes o collaborar con artistes, destacaría los momentos nos que facemos piña, nos qu’ensayamos, nos que fuera de los ensayos quedamos y pasámoslo bien”. Asina ye como diez años dempués, esta banda que nació por casualidá, caltién lo que-yos llevó a aniciar la so trayectoria y van reflexalo col arguyu del trabayu fechu, col ciñu de la so xente, y cola identidá de quien ye de la cuenca minera: “Tamos toos ilusionadísimos, dende la componente más moza hasta’l mayor de toos; tamos que nun nos lo creemos”.
