Reguerada Fest | 27, 28 y 29 de payares/
Solicitúes hasta’l 31 d’agostu.
dxpoliticallinguistica@asturias.orgCultura abre hasta’l 31 d’agostu la convocatoria
pa que les empreses participen nel Reguerada Fest 2026
- La quinta edición del festival va celebrase del 27 al 29 de payares en Candás
- El festival va incluyir anguaño la entrega de los primeros distintivos d’Alfaya, la marca asturiana d’usu llingüísticu
La Conseyería de Cultura, Política Llingüística y Deporte abrió’l plazu de solicitú pa les empreses interesaes en participar na parte espositiva del V Reguerada Fest, que se va celebrar en Candás del 27 al 29 de payares.
Les empreses que quieran formar parte del festival han comunicar, primero del 31 d’agostu, la so disposición a participar a la Dirección Xeneral d’Acción Cultural y Normalización Llingüística, al traviés del corréu electrónicu dxpoliticallinguistica@asturias.org. Nel mensaxe han indicar el nome comercial, una persona de contactu, el sector o tipu de productu, un teléfonu y unes señes de corréu electrónicu.
El Principáu trabaya yá na programación d’esta quinta edición del Reguerada Fest, un alcuentru dedicáu a les iniciatives culturales y empresariales que tienen la llingua asturiana como referencia. El festival lleva’l nome d’Antón de Marirreguera, nacíu en Carreño y autor de la que se considera la primer obra lliteraria n’asturianu.
Una de les novedaes principales va llegar anguaño con un eventu onde ta previsto la entrega de los primeros distintivos d’Alfaya, la marca asturiana d’usu llingüísticu. La iniciativa busca reconocer y dar visibilidá a les empreses y entidaes qu’incorporen l’asturianu a la so actividá.
El Reguerada Fest ufierta a les empreses un espaciu onde enseñar los sos productos y servicios y va volver convertir Candás nun puntu d’alcuentru pa la cultura, la empresa y la comunicación n’asturianu. La programación va desenvolvese nos díes 27, 28 y 29 de payares y va cuntar con propuestes pensaes pa tolos públicos.
