Publicado en Baile, Música

Nel Villanueva, el maestru de tradiciones…

Nel Villanueva, el maestru de tradiciones que despolvorió les panderetes y el baille pa reivindicar l’arguyu asturianu. Cola muerte de la so tía’l silenciu enllantóse na so casa, pero él precisaba siguir cantando y baillando: formó’l primer grupu de pandereteros asturianos y agora enseña a los que quieren aprender la música tradicional y rescatar los sones casi perdíos. El Diario

Cuando Nel Villanueva (Avilés, 1984) camina, faelo siempre como si la música marcára-y el compás. Ye daqué innatu y que quiciabes nun percibe, igual que lo ye la so media sorrisa, que siempre-y acompaña cuando entra a impartir les clases de música tradicional y baille nos diferentes pueblos d’Asturies, recuperando la ilusión y les ganes d’homes y muyeres de volver a los sones d’enantes.

Nel concibe la música, el baille y tocar los preseos siempre como una forma de “pasalo bien, de disfrutar”, y ye ende onde consigue que cada vez sían más los sos alumnos y alumnes.

Col palu d’una escoba
Se crio n’Avilés y escondíase pa cantar Alejandro Sanz na habitación, col palu de la escoba de micrófonu. “Solo sabíalu la mio hermana, yo yera bien reserváu”, esplica, mientres el so madre tarareaba a Rocío Jurado na cocina. Pero naquella familia tan musical fíxose’l silenciu de sópitu, y Nel sentía qu’aquellos silencios -y afogaben. Foi una traxedia la qu’apagó la música: la muerte d’una tía. “Cola muerte del so hermana, el mio madre dexó de cantar y yo apunté al coru de la ilesia porque nun podía vivir en silenciu”, rellata.

“Teníamos un pequeñu casete y grabábame colos cantares de la dómina. Yo tenía perclaru que quería ser cantante; al igual qu’otros queríen ser astronautes o médicos, yo quería cantar”, recuerda Nel, señalando cómo dende neñu la música convirtióse nel so oxetivu y el so camín.

Rimada d’aru y aire gayolero
Cuesta imaxinase a Nel, cola so rimada d’aru, el so pelo siempre espelurciáu y el so aire gayolero, cantando nun coru d’ilesia, pero fíxolu y guarda bien bones alcordances d’aquel llugar. “Yo yá me metiera nel coru del institutu tamién, pasábame la vida tocando: Estopa, Extremoduro… Cuando díbamos a Trasona a pasar la tarde nel merenderu, yo siempre llevaba’l mio guitarra…” y sonri, y paez que suene dalguna música de fondu, porque a esti músicu apasionáu pocos preseos aguanten.

Nel siguió la tradición familiar y matriculóse n’eletricidá col enfotu de trabayar na industria avilesino, al igual que lo fixeron el so padre y el so güelu. Pero nunca s’escaeció de la música nin quixo facelo. Al pie d’unos colegues rompió la idea de que les panderetes yeren solo cosa de muyeres: “Xuntámonos cola idea de tocar la pandereta, ¿por qué non? Teníamos munches moliciones y fixímosla”. Asina nacieron los primeros Pandereteros d’Anguaño, abriendo’l camín pa tolos que vinieron detrás.

Nel, col so proyectu personal: Leirana.

Nesa mesma visión tamién nacen Los Dalton, colos que grabó un discu completu de música asturiana pa baillar de forma tradicional. “El baille ye lo más prestoso qu’hai y nesti mundu del folclore pasamos d’una cosa a otra: del baille a la pandereta, de la pandereta al acordión, a la gaita…”, esplica Nel, convencíu de qu’agora ta nel llugar correctu, siendo maestru de música tradicional y baille, disfrutando al cien per cien d’un trabayu que siempre fuera afición.

Amás, forma parte del dúo Xarré y de la Bandina Los Llerones, y impartió talleres en llugares como’l Muséu Etnográficu de Grandas de Salime o en festivales de música folk. Agora’l so proyectu personal lleva nome propiu: Leirana, n’homenaxe a les muyeres que marcaron el so vida y ente les que se crió nesa tribu preciosa que tienen les families de los pueblos, como la d’él, que foi emigrante a Avilés, a esa ciudá onde había trabayu y la familia siempre se caltuvo xunida. Con Leriana, Nel da un pasu más “toco tolos palos de la música tradicional asturiana, non solo la del baille”

Villanueva concibe la música tradicional como daqué vivu: “Por practicidad tamién te toca evolucionalo a los tiempos de güei, tanto colos preseos pa que sía más encantu, como col ritmu de vida que llevamos, que ye muncho más rápido. Nun podemos aprender a baillar como enantes, que baillábamos too’l tiempu y cantabes too’l tiempu y pegábate ; agora ye too muncho más rápido y adaptase a lo que facemos agora y a les cualidaes d’agora. Pero sí qu’estudiu, sí que me gusta saber ónde vien y que lu sepan les mios alumnes tamién”.

“Erasmus musical”
La so formación nun se llindó a Asturies; Nel amplió la so mirada viaxando y aprendiendo d’otres tradiciones: “A la fin ye como que fui amoblando la mio casa con muebles de munchos llugares. Pasé enforma tiempu diendo a Galicia, onde tuvi de ‘Erasmus musical’, y aprendí un montón. Ellí’l folclore ta muncho más vivu, la xente bailla en cualquier romería. Equí tamién se ta recuperando, pero inda hai un fallu de raíces: nun se sofita lo suficiente dende empreses nin instituciones, y falta educación pa que la xente valore y entienda la tradición”. Y sorraya la importancia de les escueles de música: “Gracies a escueles como les de José Antonio ‘El Cantu várala’ aprendemos, ellos facilítennos el deprendimientu. Les escueles de tonada son fundamentales, son esencia d’Asturies”. Agora él ye tamién escuela.

“Hai qu’educar a la xente, y la cultura tamién hai qu’educala. Ye patrimoniu’l nuestru. Si nun nos sentimos arguyosos de la nuestra cultura, ¿quién va facelu? Y si nun la conoces, nun la vas querer”. Reflexona Villanueva sobre la visibilidá de los artistes: “Nun pue ser qu’un tíu como Rodrigo Cuevas non toque nos mayores conceyos d’Asturies”, reclama’l músicu, qu’agora vive na casa familiar, en Pumarín (Grau), el sitiu onde atopó la inspiración perenne, y onde siempre siente l’abrazu de la so güela. Nel volvió a los oríxenes.

Vivir d’esto
Y recuerda les torgues que tuvo pa dedicase a la música: “Tuvi que tar esplicándome con un vecín que quería echa-y un gabitu pa buscame una empresa na que trabayar. Tuvi que tar xustificándome que taba ganando un sueldu. Nun creen que puedas vivir d’esto. Imaxínate cómo puen validar el to proyectu personal”. Sobre les tonaes, Nel diz: “La primer vegada que cantes tonada cuéstate, ye un cantar difícil. Pero vas aprendiendo y vas #amar cuando t’enteres lo complexo que ye, d’ónde vien y lo distintu que ye. Cuando lu vas estudiando acabes entendiendolo”.

La vida y el so enfotu personal fixéron-y concentrar tolos sos esfuerzos en ser músicu y maestru de música tradicional y baille, una virtú que se fái fuerte en cada clase, cuando decenes de panderos y panderetes toquen al ritmu qu’él marca. La so filosofía ye clara: disfrutar, compartir y crear rede. Asina tamién enseña nos chigres nes sos clases de “cantares de chigre”, despolvoriando cantares de la memoria de los pueblos.

Güei, Nel Villanueva, col so particular ‘Erasmus musical’, consiguió recuperar les escueles de música tradicional y sacar a baillar a decenes de persones que taben a puntu d’escaecer los sos oríxenes. Y cuando se despide, suenen panderetes… el “Erasmus” viaxa con Nel.

Autor:

Maestra de Llingua Asturiana Colexu Carmen Ruiz-Tilve - Uviéu