Publicado en Mazcaraes, Pintura, Samaín

Nueche d’ánimes.

Astures/ Gracies Anxel, de Mazcaritos d’Uviéu por la imaxe / Nueche d’ánimes. Güei ye’l mediu camín ente’l solsticiu de branu y el d’iviernu y tamién un cambéu de ciclu ente la metá clara y escura del ciclu agrícola de l’antigüedá.

Dende entós ye una fecha especial que llega a les sociedaes tradicionales europees. Asturies nun escapa a esta tradición. Evaristo Valle dexó pintáu escontra 1927 «Mazcarones de la calabaza», güei na Colección d’Arte Banco Sabadell.


Nella vese una comparsa tradicional «faciendo la comedia» por un camín de monte, escoltando al so protagonista, una calabaza con güeyos, llarga ñariz, sombreru de paya y pañuelu coloráu al pescuezu que viaxa al llombu d’un caballu como un personaxe más.
Al so alredor, ún abre la marcha dando tumbos, una muyer carga una cesta y otru alza al vientu una bandera de tela blanco.

Ye’l mundu de les mazcaraes d’iviernu y de la Nueche d’Ánimes, el nuestru Halloween: una costume rural centenaria amestada a la seronda, al misteriu y al pasu del tiempu.

Escríbovos esto mientres preparo un amagüestu y pongo a esfrecer sidra duce. Pienso no que nos traerá esta nueva parte de la rueda del añu y siéntome estimosu pola anterior.

Autor:

Maestra de Llingua Asturiana Colexu Carmen Ruiz-Tilve - Uviéu