Conciertu históricu pa homenaxar a Ígor Medio y Carlos Redondo

El próximu 25 de xunetu Xixón va acoyer una edición nueva de la iniciativa N’Alcordanza, festival que celebró delles ediciones pa homenaxear a Ígor Medio y Carlos Redondo, amás de reivindicar la música en vivo y les condiciones llaborales del sector. Dende les 16h hasta les 22.30h, la Plaza Mayor va acoyer esti conciertu tan especial pel qu’axunta folk y rock alternativu, acordies a los estilos nos que desenvolvieron el so llabor estos dos músicos finaos hai 20 años cuando diben camín de dar un conciertu de Felpeyu en Barcelona.

Pela parte tradicional van tocar les mítiques formaciones de folk asturianu Felpeyu y Llan de Cubel y los gallegos Hermanos Castro, tamién fundadores de Felpeyu. A la estaya de rock independiente represéntenla Radio Fox -grupu tributu a Los Locos, nel que tocó Carlos Redondo-; Kactus Jack -banda enmarcada dientro del Xixón Sound-; y los gaditanos Jaguares de la Bahía, formación na que milita Paco Loco, destacáu productor y ex compañeru de Redondo en Los Locos.

La cita va ser histórica; enllena de sorpreses, d’emoción, de reivindicación, d’arguyu y d’alcordanza. Pa conocer meyor los detalles d’esti eventu que se presenta como l’anticipu al Festival Arcu Atlánticu de Xixón, falamos colos responsables de la iniciativa N’Alcordanza: el componente y fundador de Felpeyu, Ruma Barbero, l’autor de delles lletres de Los Locos y Felpeyu, Boni Pérez, y l’activista cultural xixonés Rubén Ardura.

⁠Pa quien nun conoza la iniciativa de n’Alcordanza, ¿Qué ye y cuál foi’l desarrollu nestos años?

Depués del gran conciertu d’homenaxe que se-yos fexo a Ígor y Carlos en 2007, tolos años había un conciertín de la xente del rock a mou d’alcordanza y escusa bona pa xuntase. El casu ye qu’un día falando los tres pensamos que yera una pena que nun hubiera tamién un requexu pa la parte folk, y asina entamamos en 2012 un primer festival que combinaba los dos estilos que salió mui bien, conque pal añu siguiente decidimos copiar un formatu de festival qu’hai nel Puerto de Santa María onde a lo llargo de tol día hai conciertos per tola ciudá, y asina lo fiximos cuatro años siguíos.

Pero mui importante ye que siempre quiximos que’l festival tuviere una faceta más alló de l’alcordanza, sinón que sirviera tamién como plataforma de reconocencia y vindicación de la profesión de la música n’Asturies, por eso en 2013 salimos con un manifiestu.

⁠La última vegada que ficistis daqué n’Alcordanza foi en 2016 ¿Por qué esti parón y qué vos llevó agora a recuperalo amás de, lóxicamente, que se cumplieran 20 años desque nos dexaren Ígor y Carlos?

Porque decatámonos de que teníemos ente manes un festival que taba medrando, que prestaba muncho. Llegaron a contactanos de festivales grandes y profesionales pa collaborar, pero que nun dexaba de ser frutu d’un modelu en que los grupos tocaben de manera desinteresada, y que sacábemos nosotros p’alantre con trabayu nos nuestros ratos llibres y con ayuda de xente como David Cantalejo. Albidramos qu’esi modelu nun yera sostenible, mui prestosu, pero que nun podía convertise nuna fecha más del calendariu festivu xixonés.

Les feches redondes suelen ser poderoses, y apeteciónos, depués de tantos años, volver a xuntar música y xente nun exerciciu d’alcordanza, de celebración polos años de festival y siempre de llamada d’atención pola situación na que tienen que desendolcar la so vida profesional munches persones que se dediquen a la música.

«Dempués de tantos años apeteciónos volver a xuntar música y xente nun exerciciu d’alcordanza, de celebración polos años de festival y siempre de llamada d’atención pola situación na que tienen que desarrollar la so vida profesional munches persones que se dediquen a la música»

⁠Esta edición destaca, ente otres coses, porque volvéis a un formatu grande, y ye dientro del Festival Arcu Atlánticu. ¿Cómo se cocinó la iniciativa?

Teníemos claro que nun queríemos repertir el modelu de los años del 2013 al 2016, asina que plantegamos la idega a la Conceyalía de Cultura de Xixón, acoyeron la iniciativa perbién, y trabayamos con ellos pa da-y forma a los conciertos y a la esposición. La manera d’alcontra-y un sitiu afayadizu, como ye la Plaza Mayor de Xixón, foi encuadralo too dientro de la programación del Arcu Atlánticu como una especie d’antoxana al festival. Tenemos que dicir que la predisposición del Conceyu foi total y tán encargándose de la organización y la producción cola nuestra aportación.

«Entamamos con Llan de Cubel pa pasar depués a un viaxe pela hestoria de Felpeyu, cola presencia primero de los hermanos Castro, Cástor y Félix, que van tocar con Ruma Barbero y Xel Pereda, esto ye, la formación de la primer maqueta de Felpeyu a falta d’Ígor Medio. A partir d’ehí sumaráse más xente como Xuan Nel Expósito y dalguna sorpresa más»

⁠L’eventu tien dos partes estremaes, folk y rock. Na estaya folk toquen Felpeyu, Llan de Cubel y los Hermanos Castro. ¿Por qué estes bandes?

Na parte folk pensamos que se podía facer un viaxe pela hestoría de la música folk asturiana de los últimos 30 años. Por eso’l conciertu va ser mui especial.

Decidimos cuntar con Llan de Cubel pola innegable importancia na nuestra escena musical, y porque ye un grupu col que siempre tuvieron los felpeyos una rellación d’hermandá, compartieron dellos componentes y trabayaron una forma d’entender y reinterpretar la música asturiana.

Aparte d’ellos, pensamos que nos prestaba cuntar tamién colos ximielgos Cástor y Félix Castro por tener presentes a los músicos y dellos temes de los oríxenes musicales d’Ígor Medio y colos que tamién trabayó Carlos Redondo como productor.

Los Hermanos Castro fueron fundadores de Felpeyu con Ígor y Ruma. ¿Va haber una collaboración ente ellos nel escenariu?

La estructura del conciertu folk ta pensada pa qu’en dos hores y picu se pueda ver un percorríu pelo más importante de la música folk asturiana. Entamamos con Llan de Cubel pa pasar depués a un viaxe pela hestoria de Felpeyu, cola presencia primero de los hermanos Castro, Cástor y Félix, que van tocar con Ruma Barbero y Xel Pereda, esto ye, la formación de la primer maqueta de Felpeyu a falta d’Ígor Medio. A partir d’ehí sumaráse más xente como Xuan Nel Expósito y dalguna sorpresa más que vamos dexar pa esi día. Creemos que va ser un día hestóricu pa tola xente que-y gusta la música del país.

«Tanto nel conciertu de Radio Fox como nel de Kactus Jack van xubir dellos invitaos al escenariu, pero habrá que dexar daqué nel espaciu les sorpreses»

Pela parte rock tán Radio Fox, Jaguares de la Bahía y Kactus Jack. ¿Qué podéis cuntar d’estes formaciones y de la so participación n’Alcordanza?

Los cantares de Los Locos tienen que sonar nel eventu, claro tá, y Radio Fox surdió de la primer edición de N’Alcordanza por amor de los sos componentes a elles y cubre perfectamente esi oxetivu.

Jaguares de la Bahía ye’l grupu que’l so trabayu como productor, absorbente por demás, y permite caltener a Paco Loco nel Puerto de Santa María y nun hai falta xustificar la participación de Paco nel acontecimientu. Amás, na banda tamién nos alcontramos con Pablo Errea, vinculáu a Xixón pola so presencia n’Australian Blonde y Edwin Moses.

Kactus Jack, amás de ser una de les grandes bandes de la ciudá nos 90 y cuntar con músicos mui queríos por nós, que participaron n’otres ediciones con entrega y entusiasmu, tamién na parte organizativa, como ye’l casu de David Cantalejo, cuenta nes sos files con Javi Rodríguez, collaciu íntimu d’Ígor Medio dende la más tienra infancia y, como Ígor, dibuxante de cómic qu’agora mesmo ta no más alto. La verdá ye que, ensin renunciar nin a un milímetru de calidá, siempre nos prestó que nel escenariu tuvieren persones sentimentalmente xuníes a Ígor y Carlos.

¿Va haber dalgún venceyu más ente formaciones rock y folk enriba l’escenariu más allá de compartir el cartelu?

Tanto nel conciertu de Radio Fox como nel de Kactus Jack van xubir dellos invitaos al escenariu, pero habrá que dexar daqué nel espaciu les sorpreses.

«Na esposición que va poder vese nel Antiguu Institutu de Xixón ente’l 29 de xunetu y el 30 d’agostu, van tar los cartelos de los festivales y les postales que fixeron artistes que tuvieren dalguna rellación colos homenaxaos»

Notres ediciones de N’Alcordanza participaron una montonera músicos, como tais anunciando nes vuestres redes sociales. ¿Pue ser que dalgún d’ellos xuba tamién al escenariu de La Plaza Mayor?

Na primer edición en Poniente cuntábemos con dos escenarios y un montón de tiempu y nes tres últimes facíemos un percorríu per dellos espacios de Xixón onde se programaba música. Esti añu vamos tar más xustinos, pero cada grupu ye llibre pa facer participar a quien-y paeza conveniente, asina que dalgo habrá.

Venceyada al conciertu hai tamién una esposición.

Los festivales N’Alcordanza d’Ígor y Carlos, amás de los conciertos, xeneraron una bona cantidá d’imáxenes. Na esposición que va poder vese nel Antiguu Institutu de Xixón ente’l 29 de xunetu y el 30 d’agostu, van tar los cartelos de los festivales y les postales que fixeron artistes que tuvieren dalguna rellación colos homenaxaos, nes ediciones de 2014 y 2015. A estes obres acompañaráles un monitor nel que van proyectase semeyes y vídeos rexistraos a lo llargo de les diferentes ediciones.

«Ye verdá qu’acaba d’aprobase nel gobiernu del asturianu una modificación que facilita la música nos locales pequeños, ideales pa facer cantera. Pero les torgues pa que la xente pueda dedicase a la música de manera profesional siguen siendo munches»

⁠N’Alcordanza nació tamién pa reivindicar la música en directo y unes condiciones dignes pa la profesión. 20 años dempués, ¿Cómo veis la evolución d’estes cuestiones nesti tiempu?

Pues ehí siguimos. Ye verdá qu’acaba d’aprobase nel gobiernu asturianu una modificación que facilita la música nos locales pequeños, ideales pa facer cantera. Pero les torgues pa que la xente pueda dedicase a la música de manera profesional siguen siendo munches. Nun pidimos que-yos pongan alfombres coloraes como nos Grammy, pero la consideración social de los músicos tien abondo que meyorar, munches vegaes pola parte de los que los contraten. Tampoco paez que s’adelantare muncho n’aspectos como la forma de tributar y cotizar, reconocencia de baxes llaborales, etc. La xente profesional de la música nun trabayen namás enriba los escenarios: dediquen un tiempu importante a los ensayos y les canciones nun se componen nin se igüen soles. Too eso hai que tenelo en cuenta cuando esfrutamos coles sos creaciones nuna grabación o nun bolu. Ensin cayer nel victimismu, igual fai falta un poco de llabor educativo.