🌺 🌺Reparar, afayar y conocer la redolada que nos arrodia ye daqué qu’Ángel Argüelles fai dende neñu. «Siempres tuvi enforma interés pola naturaleza», asegura esti asturianu de 27 años, quien de bien pequeno yá emprestaba especial atención a la diversidá del medioambiente. La Voz / ✒️ Esther Rodríguez
🌷El mozu uvieín Ángel Argüelles trabaya na ellaboración d’un catálogu d’esta planta presente na rexón. Consiguió yá un premiu internacional pol so gran llabor de documentación, xuntu col biólogu l.lenizu Víctor González.
De la inmensa variedá de seres vivos qu’habiten los distintos ecosistemes del nuesu planeta, les orquídees son una de les especies que más interés -y xeneren. Ye tan aficionáu a estes plantes, conocíes polos sos formosos colores y les formes de les sos flores, qu’inclusive foi galardonáu pola so dedicación a la documentación d’una de les families más estenses del reinu vexetal.
Fai apenes unes selmanes, esti mozu uvieín alzose en Dresde (Alemaña) col primer premiu de la nueva edición del World Orchid Conference, el mayor eventu internacional dedicáu a les orquídees. Con un póster sobro les distintes especies d’estes plantes herbales presentes n’Asturies, llogró unu de los máximos galardones que conceden los organizadores d’esti congresu, qu’axunta a científicos, conservacionistes y cultivadores de más de 60 países. Esta reconocencia pon en valor el llabor que vien realizando dende va cuatro años xuntu al biólogu l.lenizu Víctor González, con quien trabaya na catalogación de toles orquídees qu’hai na rexón.
«La nuesa intención ye faer una guía de campu de les orquídees qu’hai n’Asturies», esplica Ángel, quien se sumó en 2022 a esta iniciativa impulsada pol espertu en botánica cuando inda cursaba’l grau de Ciencies Ambientales ya Inxeniería Forestal na Universidá de Llión.
«Enteréme de que taba buscando xente por que participara nel proyectu y, como yo yá llevaba tiempu afitándome nes orquídees, sobremanera desque, con 11 años, vi una na Sienda del Osu que les sos flores teníen forma d’abeya, decidí xunime», detalla l’uvieín, que realiza agora un doctoráu na Universidá d’Uviéu, en llogrando’l máster n’Estudios Avanzaos de Flora y Fauna.
Para cumplir esti propósitu, lo primero que fixeron foi arrexuntar de primera esquito tola información posible sobro les distintes orquídees y la so distribución per Asturies. «Fiximos muncho trabayu de campu. Visitamos un montón de sitios pa ver si atopábamos dalguna especie», detalla.
Como nun disponíen de too el tiempu que-yos gustaría pa dedicar al proyectu y, amás, el Principáu ye una rexón bien amplia, recurrieron a los pliegos de los herbarios públicos d’Uviéu y Xixón . «Sirviónos tamién d’enforma l’ayuda ciudadana», asegura, antes de señalar que, gracies a plataformes como iNaturalist o PlantNet, onde les persones pueden xubir semeyes de plantes, percanciaron «bien de más información» de la que llograríen diendo asiduamente al monte.
«Cephalanthera rubra», «Epipactis palustris» y «Dactylorhiza fuchsii»
Tres cuatro años documentando la presencia d’orquídees n’Asturies, los dos nuevos investigadores ellaboraron un catálogu a partir de los más de 9.000 rexistros llograos, nel qu’identificaron tantu’l númberu d’especies como d’híbridos —resultancia del encruz ente distintes especies—. «En total, detectáu 53 especies distintes y 14 híbridos», detalla. Dalgunes d’elles nun fueren citaes enantes, como Ophrys speculum o Orchis spitzelii. Otres, como Ophrys lutea, anque foi rexistrada va dos décades, nun volviera a documentarse. «Sicasí, nós pudimos comprobar que siguía nel mesmu llugar y atopamos xuna nueva población totalmente natural nos Picos d’Europa», asegura Ángel.
Esti trabayu dexó-yos comprobar tamién qu’esta planta herbal distribuyise por tola rexón, tanto pola mariña como nel altu monte. «Evidentemente, en delles zones hai más que n’otres. Unu de los conceyos onde más especies reparemos ye Somiedu, y tamién abonden na redolada de los Picos d’Europa. Curiosamente, abargana de les ciudaes hai tamién bastantes especies. N’Uviéu rexistremos 28, ente que en Xixón, 17», precisa. Coles mesmes, señala que xuna de les orquídees que más se ta espandiendo n’Asturies nos últimos años, «colonizando murios, cunetes ya inclusive teyaos», ye Himantoglossum robertianum. «Les mayores poblaciones atopense nos sistemes dunares de Rodiles y Xagó», añede.
«Himantoglossum robertianum», «Limodorum abortivum» y «Nigritella gabasiana»
Toa esti llabor de documentación #recoyer nel artículu que publicaron, so la supervisión de Luis Carlón Ruiz, conservador del Xardín Botánicu de Xixón, el pasáu mes de setiembre na revista científica Mediterranean Botany. «Nél esplicamos en detalle #tou la metodoloxía siguida, según les especies alcontraes ya inclusive aquelles que se pensaba que taben presentes n’Asturies y qu’agora sabemos que nun lo tán, como Epipactis palustris y Spiranthes aestivalis, que sumieron de la mayoría de los enclaves onde crecíen por cuenta de la alteración o destrucción del so hábitat, especialmente turberas y tremedales. Tamién analizamos qué especies podríen atopase n’Asturies, una y bones l’hábitat ye fayadizu y tán presentes en provincies estremeres, anque pel momento nun fueron detectaes equí», concreta.
La principal conclusión a la que llegaron dempués d’esti trabayu ye qu’a pesar del so pequeñu tamañu, en comparanza con otres comunidaes autónomes, el Principáu tien una diversidá «bastante alta» d’orquídees. «Y eso que tampoco tenemos una gran presencia de roca caliar, que ye’l tipu de sustrato onde suelen desenvolvese», señala’l mozu investigador uvieín, antes d’apuntar qu’unu de los factores que podría esplicar esta mayor presencia ye’l cambéu climáticu. «Nes zones del interior, los branos tán siendo cada vez más secos y templaos, y nes fasteres más espuestes al sol, onde la seca braniza ye más acusada, tamos reparando l’apaición d’especies más propies del ámbitu mediterráneu. Creemos qu’esto contribuyó a aumentar la diversidá d’orquídees n’Asturies», esplica.
