Publicado en Día de..., Patrimoniu Inmaterial

Día Internacional del Patrimoniu Cultural Inmaterial

El #PatrimonioVivo esiste porque les persones caltienenlu vivu. En tol mundu, portadores y prauticantes del patrimoniu inmaterial, organizaciones de la sociedá civil, instituciones culturales y académiques y autoridaes nacionales y locales trabayen conjuntamente para salvaguardalo, tresmitilo y celebralo. Tresmitíes de xeneración en xeneración, estes tradiciones y práctiques apurren a les comunidaes un sentíu de continuidá y pertenencia.

Nesti día la UNESCO reconoz y celebra el patrimoniu vivu presente nes nueses comunidaes y más allá d’elles: les conocencies, les práctiques, les técniques artesanales, les tradiciones culinaries, los rituales, les artes y el costumes sociales que conecten a persones de distintes xeneraciones y cultures.  unesco.org/es/days/intang #ParaLasPersonas

🌿🎶 Güei celebramos el Día Internacional del Patrimoniu Cultural Inmaterial, una fecha pa recordar la importancia de mantener y tresmitir les tradiciones que formen parte de la historia y la identidá d’Asturies.

Patrimoniu inmaterial asturianu

La Llei de Patrimoniu Cultural d’Asturies(ábrese n’una pestaña nueva), aprobada n’añu 2001, aboga pol estudiu y protección de les manifestaciones llingüístiques, los vezos, les espresiones artístiques de tradición oral y otres formes d’espresión comunitaries.

🍏 La nuestra cultura sidrera y l’arte de la construcción en piedra seco cuenten col reconocimientu de la Unesco como Patrimoniu Cultural Inmaterial de la Humanidá. A elles súmase esti añu’l reconocimientu estatal de los saberes tradicionales vinculaos a los horros, paneres y cabazos.
🥁 Asturies cuenta tamién con munches manifestaciones declaraes Bien d’Interés Cultural, como l’asturianada, la misa asturiana de gaita, el corri-corri, los sidros y les comedies de Valdesoto, los bolos asturianos, el traxe d’aldeana y porruanu llaniscos, la cultura del acebache o los oficios tradicionales de navegación pela ría del Eo.
A estes manifestaciones van poder sumase otres próximamente. Yá tán en marcha los trámites pa declarar BIC les dances tradicionales, les mazcaraes d’iviernu y la cultura asturiana de la gaita, mientres avancen los trabayos pa reconocer tamién la cultura quesera asturiana y la cultura minera.
Detrás de caúna d’estes tradiciones hai xeneraciones de persones que contribuyeron a manteneles vives y qu’anguaño siguen tresmitiendo los sos conocimientos y vezos.
🤝 Dende’l Gobiernu d’Asturies trabayamos pa protexer y dar a conocer esti patrimoniu, reconociendo’l so valor cultural y el papel fundamental de les persones que faen posible que siga formando parte de la nuestra sociedá.

Censu del patrimoniu cultural inmaterial d’Asturies

 

Patrimoniu inmaterial asturianu na Llista representativa del patrimoniu cultural inmaterial de la humanidá

Conocimientos y técniques del arte de la construcción en piedra seco

En payares del 2018 la UNESCO incluyó pela primer vez un elementu del patrimoniu inmaterial asturianu na Llista Representativa del Patrimoniu Cultural Inmaterial de la Humanidá. Trátase de los conocimientos y técniques del arte de la construcción en piedra seco, que se refier a la práctica de construyir con piedra ensin usar material pa xuntalo. Esti reconocimientu pormoviéronlu dellos países europeos: Croacia, Chipre, Francia, Grecia, Italia, Suíza, Eslovenia y España, y delles comunidaes autónomes españoles (Galicia, Estremadura, Andalucía, Aragón, Cataluña, Comunidá Valenciana, Baleares y Asturies). N’avientu del 2024 inscribióse una ampliación del ámbitu del bien, incorporándose dellos países más.

Arte de la construcción en piedra seco, conocimientos y técniques(ábrese n’una pestaña nueva) (información na web de la UNESCO)

Cultura de la sidra asturiano

La cultura sidrera engloba práctiques sociales, rituales como echalo, les espiches y les romeríes, amás de tradiciones orales, paisaxes culturales y oficios tradicionales, polo que se convierte nún de los elementos identitarios de más caláu n’Asturies. La producción y el consumu de la bebida rexonal fortalecen la cohesión social al traviés de práctiques compartíes que fomenten tamién la integración y l’alcuentru.

El Gobiernu d’Asturies, xunto a los sectores y instituciones vinculaos, trabayó a lo llargo de diez años na defensa de la candidatura de la cultura de la sidra asturiano y na protección del patrimoniu vinculáu a la sidra.

Nel 2014, la cultura sidrera declaróse Bien d’Interés Cultural (BIC) de calter inmaterial y, dende entós, desenvolvióse munchu llabor pa que se llograre’l reconocimientu mundial. Nesi procesu tuvo un protagonismu destacáu’l comité director de la candidatura, integráu por representantes del sector sidreru y hosteleru, especialistes n’antropoloxía, historia y comunicación, amás de miembros de les conseyeríes de Cultura y de Mediu Rural.

El día 4 d’avientu del 2024, la UNESCO aprobó la declaración de la cultura sidrera asturiana como patrimoniu inmaterial de la humanidá. Esti determín reconoz y distingue la rellación singular qu’Asturies tien cola bebida rexonal por escelencia y qu’engloba manifestaciones variaes: dende echalo hasta los cantares tradicionales, la creación artística y el léxicu ligáu al so consumu. La cultura sidrera ye un heriedu únicu que combina tradición, sostenibilidá y sentíu de pertenencia.

Esti reconocimientu mundial pon en valor la rellación singular qu’Asturies tien cola sidra, qu’abarca práctiques sociales, rituales y eventos festivos, dende echalo hasta los cantares tradicionales y el vocabulariu ligáu a la bebida.

Autor:

Maestra de Llingua Asturiana Colexu Carmen Ruiz-Tilve - Uviéu