- A les 6:30h. d’esti xueves, alborecemos con nubosidá estratificada entemecía ente dellos claros o abancios con unes temperatures que tan alrodiu de los 11ºC, rexistrándose nel puirtu Payares 9ºC.
- Güei vamos tener dalgo de nubosidá alta entemecía ente dellos claros o abancios na metá sur d’Asturies que dirá amestándose colos estratos del alborecer nel restu, con unes temperatures que subirán llixeramente dexándonos un ambiente seliquín durante’l día.
- Mañana vienres paez que veremos dalgo más el sol, sobre too pela tarde cola apertura de grandes claros o abancios con unes temperatures que van camudar poco, calteniéndose un ambiente suave y afayaizu.
- El sábadu tendremos abondosa nubosidá baxa, sobre too na metá norte onde nun se descarta, pela mañana, dalgo d’orpín alrodiu de los cordales montañosos con unes temperatures que baxarán llixeramente.
- Y paez que’l domingu veremos más el sol cola apertura de grandes claros o abancios a partir del mediudía con un ascensu llixeru de les temperatures másimes.
- La selmana viniente, la llega d’un embolsamientu d’aire fríu en capes medies de l’atmósfera, empobinada pol anticiclón dende centrueuropa va facer que baxen les temperatures bultablemente pero pola so procedencia continental malpenes mos dexará precipitaciones, taremos sollertes a la evolución.