- «Nun tamos toes» WEB / Grupu de música tradicional feminista Lletres
Nun tamos toes ye un grupu de música tradicional feminista. La fecha de nacimientu allúgase na potente movilización del 8 de marzu de 2018: dende’l respetu a la tradición, pero con una mirada crítica, esti grupu de muyeres decidió crear lletres nueves acordies a los tiempos y les reivindicaciones de güei. Ello ye que Nun tamos toes ye un proyectu que xune tradición y modernidá al traviés de la pandereta y el panderu, tornando cantares tradicionales a lletres feministes y empleando l’asturianu nes sos reivindicaciones.
El grupu nació n’El Remediu (Nava) y ta conformáu por una decena de muyeres. La composición nes actuaciones varía porque, como el so nome diz, dacuando complícase tar toes. D’ehí vien el nome, Nun tamos toes, faciendo referencia a los casos particulares al tiempu que dende la mesma denominación se denuncien les violencies machistes.
