El cine ye un arte que dexa pensar les coses, como afirmó Jean LucGodard. Sicasí, la presencia del cine nos planes d’estudios actuales nun se correspuende cola so importancia cultural innegable.
Ta claro que’l cine tiene tovía una historia curtia en comparanza con otres artes y manifestaciones de la cultura. Pero, en poco más d’un sieglu, lo qu’empezó como un entretenimientu popular de feria convirtióse nun arte colos sos periodos, xéneros y obres maestres que yá formen parte del patrimoniu cultural de la humanidá.
Otra manera, como diz Alain Bergala en La hipótesis del cine. Tratáu pequeñu sobre la tresmisión del cine na escuela y fuera d’ella (L´hypothèse cinema. Petittraité de transmission du cinema a l´école et ailleurs), ensin un alcuentru col cine na escuela, sitiu privilexáu de tresmisión del conocimientu, l’arte y la cultura en xeneral, ye mui probable que depués, pa una mayoría, nun se va dar enxamás esa coincidencia feliz.
Cola mira d’axuntar estes idees, l’Aula de Cine de Llaboral Cinemateca ye un recursu didácticu pal aula y la comunidá educativa de los centros d’enseñanza del Principáu d’Asturies que tien por oxetu procurar una visualización “alfabetizada” básica de les obres cinematográfiques.
L’Aula de Cine compónse de venti conceptos básicos y fundamentales del llinguaxe cinematográficu, esplicaos de forma sucinta y clara, ilustraos caún d’ellos con un fragmentu d’una película, siguíu d’una sinopsis de la mesma y, a continuación, completáu con una biofilmografía del director. D’esta manera, y al traviés de la esplicación de los venti conceptos básicos escoyíos, conócense con dalgún detalle, de pasu, venti películes destacaes de la historia del cine y venti directores. Amás, de la que s’esplica cada conceptu, méntense otres películes y otros directores.
Otra manera, los venti fragmentos escoyíos pa ilustrar los conceptos básicos del llinguaxe fílmicu dexen construyir una periodización posible de la historia del cine y una clasificación elemental de los xéneros cinematográficos na midida en que caúna de les películes seleccionaes pa ilustrar cada fragmentu pertenez a un periodu históricu y a un xéneru determinaos.
L’Aula de Cine ofrezse dafechu en castellanu, inglés, francés y asturianu, cola mira d’enanchar el so ámbitu posible d’usu didácticu en materies distintes.
Los conteníos del Aula de Cine desenvolviéronse a costafecha por Fernando de Felipe Allué y por Joan Marimón Padrosa, dos reconocíos y prestixosos especialistes de la docencia y la crítica de cine con esperiencia cinematográfica.
LLINGUAXE
Cine mudu
Períodu comprendíu ente dos invenciones técniques: la del cinematógrafu en 1895 y, en 1927, la d’un sistema que dexó reproducir diálogos, música y efectos de soníu. Les bases del llinguaxe, l’impactu universal d’un mediu d’espresión nuevu y el negociu espectacular que supunxo la realización de films pertenecen al cine mudu. a esta dómina inicial del cine. Los años de 1895 al 1915 son esenciales pa l’adaptación de los mecanismos del rellatu lliterariu y del llinguaxe de la pintura al cine, a lo qu’hai qu’añedir la creación d’una llista llarga de recursos propios del audiovisual inda vixentes (montaxe per corte, llei de la exa, planu suxetivu, convención del planu-contraplanu, etc). Directores como David W. Griffth (Intolerancia, 1915), Wilhelm Murnau (Nosferatu, 1922) o Fritz Lang (Metropolis, 1926) llogren obres fundacionales. Y el cine soviéticu de los años 20, con directores como Sergei Eisenstein (L’acorazáu Potemkin, 1925), Vsévolod Pudovkin (La madre, 1926) y Dziga Vertov (L’home de la cámara, 1929) constitúyese nuna de les etapes más creatives qu’existieren na historia del cine.
Cine de vanguardia
Códigu desconocíu | L’home de la cámara
Cine de busca de formes nueves de llinguaxe alloñáu de los códigos comerciales qu’axunta les tendencies más avanzaes de cada dómina. Polo xeneral esti tipu de cine tiende a vulnerar la narración clásica, esperimenta con combinaciones nueves d’imaxe y soníu y suel conectar con movimientos que tienen la presencia nel campu de les belles artes. La primera gran dómina del cine de vanguardia son los años venti, cola irrupción de dellos tipos de cine que marquen les llinies que se van siguir más p’alantre: cine astractu, espresionista, surrealista y tol bloque de cineastes soviéticos que con delles pieces híbrides (L’home de la cámara, 1929) quieren pal audiovisual un llinguaxe propiu alloñáu del drama lliterariu. Una segunda gran fola surde nos años sesenta, ye contemporánea de los Cines Nuevos como la Nouvelle Vague (A bout de souffle, 1960) y da pie a movimientos como Fluxus, el cine underground y el cine estructuralista. Una tercer fola manifiéstase dende últimos de los años 80 cuando la era dixital n’obres que s’ufierten dende’l formatu de la videocreación, el del videoclip y delles veces nel llargumetraxe industrial (Códigu desconocíu, 2000).
Cine clásicu
M, el vampiru de Düsseldorf | La ronda | Lloquilandia | La ventana indiscreta | Sunset Boulevard
Dómina del cine que s’esparde dende primeros de los años trenta hasta mediaos de los cincuenta na que cristalicen los xéneros principales del audiovisual, como el musical, el western, la comedia, el fantásticu, el thriller, el cine d’aventures y el drama románticu. Directores como John Ford (La dilixencia, 1940), Ernst Lubistch (Ninotchka, 1939), Billy Wilder (Sunset Boulevard, 1950) o Alfred Hitchcock (La ventana indiscreta, 1954) rueden dalgunos de los sos films más relevantes. Quiciabes fore una de les dómines de más enfotu nes convenciones de caún de los xéneros, que se manifiesten como formes de poder inalterables. El “clasicismu” alude a lo que se consideró equilibriu y perfección de los recursos formales, de los conteníos argumentales y inclusive a la elección de los actores pa toles tipoloxíes de personaxes.
El cine de la modernidá
Hiroshima mon amour | Qué difícil ye ser un dios | Soi Cuba | Ocho y mediu | The Kubrick zoom | Apocalypse now | Casinu
Cine con voluntá d’innovación que reacciona al llinguaxe de normes fixes de la dómina clásica, vulnerando la gramática visual hasta entós establecida y atentando contra fórmules de narración qu’enantes paecieren intocables. Surde a últimos de los cincuenta, cola Nouvelle Vague francesa (Hiroshima mon amour, 1959) y el cine nuevu de delles partes del globu, dende Europa Oriental (Les margarites, 1966) hasta Brasil y toa Llatinoamérica (Soi Cuba, 1964), atopa na década de los años sesenta la manifestación más enérxica, anque l’espíritu de vulneración de les convenciones caltiénse nos años setenta (Apocalypse Now, 1979), enfatizando elementos como la violencia o’l sexu, y allárgase entá nos años del cine postmodernu y de la era dixital actual.
Cine postmodernu
L’árbol de la vida | L’asesinatu de Jesse James pol cobarde Robert Ford | Hana-Bi | Léolo
Tipu de cine que reacciona contra la voluntá de ruptura del cine nuevu de los años 60 pero de forma débil, recuperando tanto fórmules tradicionales como recursos propios de la mesma modernidá, o bien entemeciendo dambes llinies de trabayu, y inclusive otres, nun mesmu productu. El cine posmodernu ye suxetivu, eclécticu, metalingüísticu y deconstructivu (Desmontando a Harry, L’asesinatu de Jesse James pol cobarde Robert Ford), irónicu y tresxenéricu (Hana-Bi, Léolo, PulpFiction) y, al revés que’l cine clásicu, a menudo favorable a dobles o múltiples llectures y desenllaces abiertos (Abri los güeyos). Suel aplicase al cine de los años ochenta n’adelantre, anque los sos antecedentes pueden atopase en films de dómines anteriores.
La era dixital
La era dixital empieza a últimos de los años ochenta cuando’l videu analóxicu da pasu al dixital. Dende esos díes, la revolución dixital ta modificando toles partes del procesu de producción audiovisual, camudando adulces tol paisaxe, dende les formes d’almacenamientu y visionáu d’información hasta los decoraos virtuales, trucaxes y efectos de postproducción de toa mena (Cloverfield), y sumando conceptos nuevos de creación narrativa como’l llinguaxe interactivu o’l rellatu tresmedia. El cine mainstream aliméntase de los avances nuevos que se van socediendo de forma regular, siendo l’animación (Toy Story, Up) y el cine fantásticu d’efectos especiales (Avatar) dellos de los campos más sensibles a les posibilidaes nueves del espectáculu audiovisual.
Xéneros
Comedia
Xéneru principal del audiovisual que se caracteriza por una visión humorística y a menudo crítica de la realidá. Anque seya’l xéneru con más bayura de ramificaciones, les llinies principales son la variante física (slapstick d’escorribandes y golpes) y la verbal (como la “sitcom” o comedia de situación), la periodicidá de gags que provoquen la risa y, sacante delles comedies agridulces o esperpéntiques, el final feliz.
Drama
La Ronda | L’árbol de la vida | Léolo
Xéneru principal del audiovisual que se caracteriza por temes, argumentos y personaxes realistes, un tratamientu polo xeneral pesimista y un desenllaz desesperanzáu o tráxicu. A menudo busca la crítica social, y movimientos como’l Neorrealismu italianu (años 40) y el Free Cinema inglés (años 50) encuádrase nel so arcu d’acción, igual que parte del cine románticu y el melodramáticu.
Western
L’asesinatu de Jesse James pol cobarde Robert Ford
Xéneru realista, dramáticu, épicu y d’aventura con unes histories asitiaes nel Oeste americanu nel lapsu que va de mediaos a últimos del sieglu XIX. Nel periodu clásicu foi ún de los xéneros principales xunto al musical, pero dende los años sesenta, depués de los periodos de western psicolóxicu, el spaghetti western y el western crepuscular, la so influencia baxó ensin llegar a sumise, afaciéndose a les modes nueves como’l cine posmodernu.
Cine negru / Thriller
Sunset Boulevard | La ventana indiscreta | M, El vampiro de Düsseldorf | Casinu | Hana-Bi
El thriller ye’l superxéneru que trata argumentos rellacionaos col crime, englobando ente otros el xéneru negru, el policiacu, el de suspense y inclusive’l de terror realista. Robos, secuestros, violaciones y asesinatos son los sos elementos dramáticos principales. Cada ramificación tien les sos propies característiques. El cine negru suel tratar de detectives que se mueven n’ambientes sofisticaos dientro d’histories llaberíntiques con muyeres fatales y malvaos toupoderosos, orixinalmente en films de los años trenta y cuarenta adaptaos de noveles.
Fantásticu
Qué difícil ye ser un dios | The Kubrick zoom | Cloverfield
Xéneru principal del audiovisual opuestu al realismu que parte de la maxa y la voluntá de tresgredir les lleis naturales, garra l’animación y la ciencia ficción y repártese ente’l xéneru d’aventures, el musical, el terror non realista y parte del cine poéticu. Les sos dos llinies de trabayu principales son el fantásticu blancu, alredor del conceptu moral del bien (Georges Méliès, Walt Disney), y el so opuestu’l fantásticu escuru (David Cronenberg, Jan Svankmajer).
Musical
Xéneru onde la música y la danza conviértense nel vehículu principal del espectáculu y de la espresión d’emociones de los personaxes. El musical, polo xeneral vinculáu a histories de trama amorosa, muévese dende la comedia hasta’l fantásticu, el drama realista y la traxedia. Ye ún de los xéneros principales del cine clásicu qu’a partir de los años setenta atopa una manifestación nueva nel formatu curtiu del videoclip.
Bélicu
Apocalypse now | The Kubrick zoom
Xéneru de rexistru realista polo xeneral basáu en fechos reales y averáu al filme d’aventures, al cine d’acción y tamién al drama psicolóxicu que trata de los conflictos bélicos de los sieglos XX y XXI (los de dómines anteriores considérense films históricos). En xeneral, los argumentos traten de la perda progresiva de compañeros por causa d’una misión qu’hai que cumplir, una batalla o cualquier tipu d’enfrentamientu, polo que’l tonu suel ser desesperanzáu y críticu.
Cine d’autor
L’árbol de la vida | Hiroshima mon amour | The Kubrick zoom | Ocho y mediu | Códigu desconocíu | Léolo | Hana-Bi
Tipu de cine al marxe de los xéneros y vinculáu a los estilos personales de los directores con una poética que constituye un universu coherente que nos más de los casos xenera imitadores. Anque dellos directores foron quién a establecer estilos propios dientro de los xéneros, como Alfred Hitchcock dientro del cine de suspense, la mayoría de films d’autor (Federico Fellini, David Lynch, Alain Resnais, Andrei Tarkovsky, Stanley Kubrick) surden de los años sesenta n’adelantre y namás pueden definise de forma individual.
Documental
Soi Cuba | L’hombre de la cámara
Xéneru que parte de fechos reales pero qu’al revés que la noticia o’l reportaxe pue almitir un grau curiosu de suxetividá. El formatu ye abondo ampliu como pa que s’inscriban nél dende’l rexistru didácticu (incluyendo los tutoriales d’internet) hasta’l promocional (making of), el d’autor, el falsu documental (mockumentary) y el filme híbridu que pue suponer la mezcla de ficción y de realidá.
Animación
Conxuntu de técniques que doten de movimientu a dibuxos, pintura, moñecos, oxetos y materiales de toles menes, incluyendo tamién a los seres humanos. Anque cualquier xéneru ye susceptible de ser tratáu dende l’animación, incluyendo’l documental, la orientación natural d’esti formatu ye’l xéneru fantásticu, que dexa vulnerar les lleis naturales a les que se suxeten los xéneros realistes.