Apuerta l’Antroxu modernu, que trai cinco díes de mázcares y diversión

• Fonte: Asturies.com / David Guardado

Esta nueche ye Comadres, festexu que da entamu a les celebraciones del Antroxu modernu. Per delantre queden cinco díes de mazcaritos y muncha folixa onde la gastronomía tien un pesu importante, colos productos procedente del gochu y los postres como los frixuelos, les picatostes y les casadielles como protagonistes.

Les asturianes y asturianos, que preparen los sos traxes p’amarutase en familia o con collacios, miren al cielu esti Antroxu, folixa siempre mui esperada. La previsión d’agua ta presente, anque nun s’esperen xarabatos, sacante la tarde-nueche del vienres, sí raches fuertes d’aire que nun van afeutar a la programación amplia preparada en llugares como Xixón y Avilés nin les ganes de celebración.

Esta nueche arranquen los festexos con Les Comadres, festividá protagonizada por muyeres con un orixe que pudiera tar fuera del Antroxu tradicional. Xixón y La Pola Siero son les villes que nos años últimos caltienen con más fuercia esta tradición que mantuvieron per munchos años les cigarreres de la fábrica de tabacos de Cimavilla.

Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, ‘teresites’, frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles.

Col pasu del tiempu la folixa treslladóse de la tarde a la nueche y munchos restoranes ofrecen menús especiales pa esta xornada. En La Pola, amás hai verbena dende les 23 hores cola orquesta Waykas y DJ Hugo Llamedo.

A una filósofa

Ye de destacar tamién el llabor de la Tertulia Feminista Les Comadres pa potenciar esta fecha festiva, dando-y un toque reivindicativu. Esti añu torna la celebración presencial pa la entrega de los sos premios, el ‘Comadre de Oro’ y el Felpeyu –ésti últimu a persones o entidaes que desprecien a la muyer–, en La Buena Vida dende les 20 hores con cena y baille.

El ‘Comadre de Oro’ ye pa la filósofa madrilana Monica Alario, la más moza en tener esti reconocimientu, que va entregar, como ye tradición, la cómica valenciana Patricia Sornosa, merecedora del mesmu l’añu pasáu. Les Comadres emponderen la so tesis na que fai un “análisis de la rellación ente la pornografía y la violencia sexual” y la so obra ‘Política sexual de la pornografía: sexo, desigualdad, violencia’.

Nel llau de los antipremios, el títulu de Felpeyu va pal andaluz nacíu en Canarias, ex presidente de la Real Federación Español de Fútbol, Luis Rubiales “pola lleición de machismu na asamblea de la Federación”. Esti añu tamién entrégase’l Babayu, que la tertulia dedica presentador de televisión valencianu Pablo Motos “pola so promoción del machismu nel so programa”.

Lloñe de la tradición

L’Antroxu entamaba nel pasáu col solsticiu d’iviernu, con mazcaraes per tol país, y agora, tres la recuperación acontecida cola fin del Franquismu, resúmese a les xornaes previes al Miércoles de Ceniza, primer día de la Cuaresma. Una vuelta, sicasí, alloñada de la tradición, imitando a los carnavales más mediáticos como’l de Rio de Janeiro, Tenerife, Las Palmas o Cádiz.

Los antroxos de Xixón y Avilés son los más importantes en cuantes a programa institucional y participación. Los xueves ye habitual ver a los neños amazcaraos nos colexos y los vienres en Xixón les charangues calecen motores pal concursu d’estes formaciones del sábadu y del domingu, que yá va pola so trentena sesta edición con una participación alta y fileres na nueche pa mercar entrada pal Teatru Xovellanos.

El sábadu los focos van p’Avilés, onde se celebra’l Descensu Internacional y Fluvial de Galiana, na so trentena sesta edición, que s’adelanta a les 18 hores cola participación de 30 artiluxos, 5 más que la edición pasada. Una gran cantidá de chigres de la ciudá antróxense pa estos díes pa participar nun concursu entamáu polos comerciantes de la ciudá, esti añu baxo la temática de les belles artes, y la xente sal a la cai coles sos mázcares pa pasar una xornada de folixa.

El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. N’Avilés recuperóse nel 2022 y l’añu pasáu incorporóse una recreación de Cortexos de Mazcaritos Tradicionales, que va salir a les 12.30 hores del CEIP Palacio Valdés con final n’El Parche, onde va rememorase la puya’l gochu.

Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes –ye especialmente espectacular el de Xixón, con salida a les 19 hores de la plaza de toros y final en L’Humedal– y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más vezu d’antroxase, sobre manera la más mozo.

El xolgoriu del Antroxu termina’l Martes d’Antroxu col Entierru la Sardina –n’Avilés celébrase’l miércoles y esti martes tien llugar el desfile a les 18 hores–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte. Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne.

Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos, les casadielles y les picatostes.

Celebración en Cuaresma

En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como asocede en Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares.

Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa, asina como otru de Pilar Sánchez Vicente entituláu ‘L’Antroxu’. Los más mozos tamién pueden averase a esta celebración col reportaxe de la nuesa estaya infantil ‘A la Gueta los Suaños’ sobre la tradición o’l más reciente entituláu ‘L’Antroxu y la lluna’ qu’esplica por qué cai nuna fecha diferente cada añu.