Educación impulsa’l proyectu ‘Llume’ para reconocer la excelencia de los centros na enseñanza, promoción y espardimientu del asturianu y el eonaviego. La conseyería peracaba la primer convocatoria, que va partir 12.000 euros n’ayudes ente la rede pública y 4.000 na alcordada. Les iniciatives tendrán d’incorporar elementos venceyaos a la inclusión, la sostenibilidá, l’enfoque competencial y la coeducación. Actualidá
El Gobiernu del Principáu impulsa’l proyectu educativu Llume, destináu a reconocer la excelencia de los centros docentes na enseñanza, promoción y espardimientu de la llingua asturiana y el eonaviego. La iniciativa va consistir n’una convocatoria añal para conceder ayudes a los centros participantes sosteníos con fondos públicos.
El proyectu Llume tendrá de recoyer les actuaciones realizaes na área o materia de Llingua Asturiana y Lliteratura, según el grau d’integración del asturianu o’l eonaviego na vida académico y cultural del centru. Van aceptase proyectos desenvueltos el cursu pasáu o previstos para’l qu’acaba d’empezar.
Les propuestes orixinales van tener que tar redactaes íntegramente n’asturianu o eonaviego. Tamién tendrán d’incorporar de forma esplícita elementos venceyaos a la inclusión educativa, la sostenibilidá, l’enfoque competencial y la coeducación.
Los criterios de valoración van sorrayar la calidá del programa, según el contestu y situación del centru escolar, en función de les sos necesidaes específiques culturales, educatives, económiques y sociales. A lo último, van tenese en cuenta los antecedentes n’iniciatives rellacionaes cola convocatoria.
La orde qu’establez el procedimientu para reconocer estos proyectos Llume yá se publicó nel Boletín Oficial del Principáu (Bopa), xuntu coles bases reguladores. Coles mesmes, la Conseyería d’Educación ta peracabando la primer convocatoria, na que se va dar una mayor concreción a eses bases.
La primer edición de Llume cunta con una partida de 12.000 euros para partir ente los centros públicos participantes y otros 4.000 pa los alcordaos. Educación preve apurrir les ayudes antes de finales d’añu. Los escoyíos van recibir tamién una placa acreditativa.
