El grupu Llabor escava en La Campa Cueiru, en Teberga
A 1.500 metros d’altitú, na redoma de Teberga, Somiedu y Miranda, ta La Campa Cueiru. Un llugar históricu pola so importancia comercial.
El grupu Llabor, de la Universidá d’Uviéu, celebra la so cuarta campaña arqueolóxica na zona. La investigación céntrase nuna antigua venta fundada a finales del sieglu XV que sirvió d’abellugu a los comerciantes del Camín Real de la Mesa.
Al pie de la venta atoparon una antigua ferrería, que sirvía pa reparar los carros que viaxaben pel camín.
Amás de l’actividá acomuñada a la venta, esti llugar sirvió de referencia a les comunidaes vecines gracies a la so feria ganadera, una de les más grandes del noroeste d’España.
L’oxetivu de la campaña ye documentar dalguna de les fases constructives del Camín Real de la Mesa pa poder reconstruyir la hestoria de la contorna.
